Aizawl: Mizoram IAS Association-in a hnuaia thawkte hekna avanga Commerce & Industry department Director Maria CT Zuali hna atanga sawn chhuah a ni chu tha lo an tih thu an sawi.
Nimina thuchhuah an siamah Mizoram IAS Association chuan an member Maria CT Zuali chunga thil thleng chu ngun taka an zirchian thu an sawi a. June ni 24, 2024-a Director of Commerce and Industry atan ruat a ni a, kum khat awrh a awm chauh tuhin a thawhpuite intelkhawm hekna avangin September ni 1, 2025 khan Special Secretary, Department of Fisheries ni turin a sawn chhuak a. Ni rei lo te hnu, September ni 4, 2025-ah Secretary, Horticulture Department chelh turin sawn leh a ni a. An hekna chu a dik nge dik lo tih finfiahna awm lo va, a mi chhawrte ngeiin vau titiha sorkar an nawr avanga sawn chhuah a ni chu thil mak tak a nih thu an sawi.
Mizoram IAS Association chuan a hnuaia thawkten an hekna hi thudik behchhan a ni nge ni lo tih enfiahna (enquiry) lak pawh awm lo va, hetianga senior officer lak chhuah hi hun lo kal zel atan thil tha nia an hriat loh thu an sawi a. He thil avang hian hun lo kal leh zel turah pawh eng department pawhin an hotu ber te hi nek chhuah tuma hekin, chu an hekna chu a dik leh dik loh pawh finfiah lova senior officer te tuartir zel hi thil awm thei a la ni chho ngei ang tih an hlauhthawn thu an sawi bawk.
Sorkar hian IAS transfers and postings rules hi fel tak a neih an rin thu sawiin Mizoram IAS Association chuan, chung dan palzuta a hnuaia thawktuten senior office la chhuak tura sorkar an nawr hlawhtling thei hi ram danga thil thleng vang tak nia an hriat thu an sawi a. Social media-a an hmuh thenkhat anga Maria CT Zuali hian inthunnunna a kenkawh khauh deuh avanga a hnuaia thawkte hi an lungawi lova an hek hlawhtling ta a nih phei chuan, deparment dangah pawh nghawng tha lo tak a nei ngei ang tih a hlauhawm tih sawiin, “Sorkar thil tum tha tak office hun vawn dik, dawrtute biak tura mahni thutna kalsan lova ban huna ban tih te hi a kenkawh a har palh ang tih a hlauhawm bawkin kan hria,” tiin, heng zawng zawng ngaihtuah leh mipui tana tha zawka ngaiin, sorkar hian Director, Commerce and Industry hna atanga Maria CT Zuali a sawnna thupek hi ennawn lehin, Director Commerce and Industry hnaa dah let lehna tura thupek chhuah thuai an ngen a ni.