Aizawl: Kum 20 chhungin Mizoramah fa lak (adopted children) 572 an awm.
Mizoram sorkar Social Welfare, Women and Child Development Department leh Central Adoption Resource Agency (CARA) tangdun huaihawtin nimin khan Zarkawt-a Hotel Regency Conference Hall-a fa lak (adopted children) chungchanga hriat tur pawimawh inzirtirna – State Level Orientation and Training Programme on Adoption Regulations, 2022 buatsaih a ni a, Social Welfare Minister Lalrinpuii’n a hmanpui.
He huna tarlan a nih danin, kum 2005 atanga kumin August thla thleng, kum 20 chhungin Mizoramah dan ang taka fa lak 572 an awm a, tun dinhmunah fa lak nghak mek nu leh pa 36 awmin, dan ang taka fa lak theih 19 awm mek a. Dan ang taka fa la theih tura buaipui mek mi 11 an awm a ni.
Mizoramah fa lak chungchang buaipuitu District Magistrate (DM), District Child Protection Unit (DCPU) leh Child Welfare Committee (CWC) te chu district tinah pakhat theuh an awm a, Specialised Adoption Agency (SAA) 13 leh Chief Medical Officer (CMO) 12 awm bawkin, State Adoption Resource Agency (SARA) pakhat a awm bawk a ni.