Chief Minister Lalduhoma chuan Mizoramah ruihhlo a tam avangin supply lam dan chah tumin hma an la nasa thin a, a man pawh an man nasain a sangha lian pawh an man zauh zauh tawh tih a sawi.
Nilaini khan Chief Minister Lalduhoma chuan sorkarin PPP Mode-a Synod Camping Centre, Neihbawia a kalpui Hulhhliap Short Stay Centre (SSC) a tlawh a. Social Welfare Minister Lalrinpuii’n a tawiawm.
Chief minister chuan Mizoramah ruihhlo avanga harsatna tawk an tam avangin sorkar chuan tuna an mamawh ber nia ngaiin Hulhliap SSC an kalpui tih a sawi a. Ruihhlo ngaite chu an nghei theihnan an tanpui satliah lo va, a nghei hlenten eizawnna an neih theihna turin skill training chang tak an pek nghal avangin a sim duh tak takte tan chuan tun hun tluka hun tha a awm lo tih a sawi.
Mizoramah ruihhlo a tam avangin supply lam dan chah tumin hma an la nasa thin tih sawiin chief minister chuan, “A man pawh kan man nasa a, a sangha lian pawh kan man zauh zauh tawh a ni,” tia sawiin, tunah hian ram dang atanga a rawn luhnate dan chah tumin Operation Jeriko an kalpui leh mek thu a sawi bawk.
Hulhhliap SSC kalpui nan hian sorkarin Rs. nuai 108 a pe a. Batch 4-na hi September thlaa neih leh tum a ni a. Batch hmasa ber leh a dawttua lutte an chhuizuinaah nimin thlengin zaa 74-te chu ruihhlo lakah an fihlim zui zel tih hmuhchhuah a nih thu, sorkar thuchhuahin a tar lang.