NDA-in vice president inthlana an aiawha an vawrh chhuah, Maharashtra Governor CP Radhakrishnan chuan Jagdeep Dhankhar a thlak dawn ta a. Kum 68 mi hian Thawhlehnia inthlanah vote 452 hmuin a tling.
Radhakrishnan khingtu, eptu tangrual, INDIA-in an vawrh chhuah, Supreme Court judge hlui, B Sudershan Reddy chuan vote 300 a hmu bawk.
Vote 754 tlaah 15 chu a thi a. Vote nungah Radhakrishnan hian vote 452 hmuin Justice Reddy hian 300 a hmu tih Returning Officer PV Mody-a’n a puang.
Vote 150 awrh chauhva an inthlau hi vice-president thlannaa inthlauhna tlem ber zinga mi a ni a. Kum 2022-a Dhankhar-a’n eptu candidate, Margaret Alva a hneh kha inthlan hnuhnung paruka inhnehna sang ber niin vote 528 leh 182 an hmu.
Candidate pahnihten vote an hmuh dan atangin MP thenkhatin an party thlawp loh zawk an vote niin a lang a, hei hi eptu MP-te tih a nih rin a ni a. MP 15 velin NDA candidate an vote nia ngaih a ni.
Congress erawh chuan eptu MP 315 chu an inlungrual vek tih an sawi a, NDA chuan state inthlana an tih dan thin ang bawkin eptute dah hniam tumin thil an sawi niin an puh.
NDA hian vote 427 an nei a, an zinga tel ve lo, an candidate thlawptu, YSR Congress-in MP 11 an neih nen vote 438 nei tura ngaih an nih laiin Radhakrishnan-a hian vote 452 hmuin an chhut lawk aiin 14-in a hmu tam.
Vote thi 15 awm pawh eptute vote a nih rin a ni a. Congress erawh chuan vote 315-in an candidate Reddy-a an vote thu an sawi a; mahse, vote 300 chauh a hmu si a ni.
BJP hruaitu, Nishikant Dubey-a chu hemi chungchang sawi chhuak hmasa bertu niin X-ah ‘mi 15 chu tlan bovin min vote a ni’ tih a tar lang.
“Mipuite ang bawkin an hruaitute pawh an tlan bo mek a… Eng pawh ni se Pu Rahul Gandhi, vice president thlanah hian ballot paper hman a ni a, E (electronic) hman a ni lo,” tiin Congress hruaituin tun hnaia BJP-in vote rua a puhna a sawi lang tel.
Vice president atana thlan tak, Radhakrishnan-a hi Tamil Nadu-a BJP hruaitu hlun tak a ni a. Coimbatore bial atangin Lok Sabha MP-ah vawi hnih thlan tlin tawh niin an state BJP chief pawh a hmain a ni tawh.
February, 2023 atanga July, 2024 chhung khan Jharkhand larsap a ni a, hetih lai hian Telangana larsap leh Puducherry lieutenant governor nihna a chelh pah a. Hruaitu fân thei tak leh puitling tak, an party chhunga mite bakah party dangah pawh thian ngah tak nia sawi a ni.
Eptute chuan chhim lam state-ah assembly inthlan a hnaih mek avangin mipui hip nan rorel lai hian candidate atan an dah niin an sawi.
Congress chief Mallikarjun Kharge-a chuan vice president thar tur hi a lawmpuina X-ah a tar lang.