- K. Hmingthankaia
Miten engah maha an ngaih ve loh thil ho te te ngaihmawh ching ka ni. City bus-te stand-a an ding rei thin lutuk pawh hi ka veina a rei tawh. State dangte tih ve loh, hnamdang hmuhah pawh a zahthlak thute, smart city nen a inhmeh loh thute, traffic jam a tih zual thute, public transport man tlawm ber hi rintlaka siam a tul thute leh, nikhat thil thua ban theih driver leh conductor-ten nikhat thil thua hlep ruk tur an duham vang mai mai a nih thute ka lo sawi fo tawh a ni. ACBOA lam pawh ka be tawh. Mahse, a sawt lo.
Tun ZPM sawrkarah pawh hian ka sawi tam leh tawh naa, ka beidawn leh tep hnuin, August ni 13 zinga video viral, Durtlang sikul naupangte city bus hnunga an bet far ka hmuh atanga ka thu ziahah chuan, a tawp nan tiin ka’n sawi tel leh hrama, rin loh takin a tuk lawkah sawrkar, STA chuan passenger chhuk leh lawn chhung bak city bus-te stand-a din phal a nih tawh lo thu a rawn puang ta mai chu..ka lawm kher asin. Durtlang tan city bus dang 3 tlan belhtir a nih tawh dawn thu ACBOA lamin an puang nghal bawk. ZPM Sawrkar chungah lawmthu ka sawi e. Kha video leh a ti viraltu kha i tangkai lutuk, i ti tha lutuk e. Kha thil kha thleng lo se, awmzia ala awm chuang lo ang. Kei lahin sawi ka lo tum tawh si lo.
Mahse, engvangin nge thla hnih chhung enchhin tih hi a tulna? Stand-a rei tak din reng thin kha tihdan tur ve reng pakhatah kan ngai em ni? Tih dan thar tha zawk leh dan dik zawk, hmasawnna a awm dawn chuan thil danglam leh khawimaw laiah enge maw nghawng chu a awm zel ang chu. Mahse, dan dik zawk chu kan kaltlangpui zel tur a ni. Reiloteah thil tha tih chu ngaiah kan nei leh mai dawn a ni.
Mipui tan leh khawpui tana thawvenna leh that zawkna, hmasawnna leh changkanna tih hriat reng leh hmuh theih reng hi enchhin a tulna ka hre lo a ni. Ni reilote chhung pawhin traffic police-ten a thatna an sawi theih nghal tawh hi.
An tihdan pangngaiin thil tha sawisel tum hrim hrim thenkhatte leh bus lam pawhin eng eng emaw sawinawi kual tur chu an nei ngei ang. Mahse, tute emaw hlawkna tur ringawt ai chuan khawpui leh mipui engthawlna leh hmasawnna hi a pawimawh zawk a ni.
Engti zawng pawha ngaihtuahin, bus- te hian a hma ang thoin an mi phurh turte hi an chan phah dawn hek lo, phurh tur an hmu hnem telh telh zawk ang. Tunah chuan bus-in mipui nghak chhuak tawh lovin, mipuiin bus an nghak chhuak ve thung dawn a ni mai. Chu chu tih dan dik leh kawng engkima tha zawk a ni. Thui tak chuang tur tan stand tina din veng veng chu hun tam tak paihna a ni a, bus-a chuan loh mai a ngaih phah thin a ni.
He thupek hman tan ni, September ni 1-khan tum lawk reng vang ni lovin, keima pawimawhah bus ka chuang kual vak maia, Upper Bazar-Ramhlun north-AMC Office-Ramhlun north-Bara Bazar, cheng 80 man ngawt ka chuang a ni. Mahse, bus-ten thupek an zawm leh zawm loh hriat nan a tha khawp mai. Ka chhuanna bus bakah, kan hma amite leh min tawk zawnga lo kalte chu stand tinah ka en ru thina, an stand dinna leh an din rei zawngte, an bus number-te, ka hmuh hun darkar leh minute-te ka chhinchhiah vek a ni. Ka chuanna pawh ka chhuk hnuah kal bo mai lovin ka en ru zel. Tlemte tih loh chuan thu an awih hlawm viau, mahse, din rei chu an la chak hlawm khawp mai. Conductor pakhat ka zawh chuan, ” Din rei pawh tum ila traffic police-ten min umchhuak zel alawm” a ti. Zemabawk atanga Aizawl pan,Thuampui AMC office bul stand-ah erawh an la innghak chhuak zel. Hun remchangah ka la chuang kual leh anga, thu awihlo zual chu a hmaa ka chhinchhiahte nen hian ka tilang vek tawh ang.
Thil lian leh ropui tak tak sawi leh hawn fo karah hian, thil ho te anga lang, mahse, mipui hne hnai, mipuite awlsamna leh thawvenna lam, thil til tih awlsam si hi sawrkar hian ngaihtuah leh tih nachang hi hre thin sela, fak an hlawh zawk ngei ang. Mipui pawhin sawrkarin kan awlsamna, kan thawvenna, kan himna, kan tana tha tur leh hmasawnna tur thil tha a tihte hi hre rengin sawrkar chungah lawm nachang i hre thin ang u.