Joint Civil Society of Mizoram (JCM) huaihawtin nimin khan assembly session neih zawh taka Mizorama Forest Conservation Amendment Act (FCAA), 2023 pass tak duh lohna leh dodalna lantir a ni a. Chief Minister Lalduhoma lem chuanna poster hal a ni bawk.
Vana pa Hall kawta punkhawm hi JCM Convener Dr Lalbiakmawia Ngente-in a kaihruai a. Thusawiin Mizoram Assembly Session-in FCAA 2023 a pawm tak avangin Mizoram inven theihna awmchhun pakhat, Article 371G chu hman theih a ni tawh lo va, sorkar laipui hmalakna chu state sorkar leh Mizo mipuite chuan sawi theihna leh lo dan theihna dan an nei tawh lo tih sawiin, environment leh ramngaw humhalh tura vantlang mipui rawnnate pawh a awm thei tawh dawn lo tih a sawi.
Punkhawmah hian Mizoram First aiawhin ZR Thanghmingliana, Centre for Environment & Social Juctice aiawhin Joseph Hmingropuia leh Mizoram Transformation Movement aiawhin Dr Vanlalsiama Chhangte te pawhin thu sawiin, Mizoram Assembly Session-in FCAA 2023 a pawm an duh lohzia leh Mizoram dinhmun a tihderthawn ziate an sawi a. Mizo thalaite chu ram leh hnam tana au chhuak turin an chah.
He hunah hian political party hrang hrang aiawhte pawhin thu an sawi a. Pungkhawmte hian FCAA 2023 an duh lohzia lantir nan thuziak hrang hrang an ken bakah an au rual a. Chief Minister Lalduhoma lem chuanna poster an hal bawk.
Hei bakah hian online leh offline signature campaign buatsaih a ni bawk.
FCAA 2023 dodalna hi Central YMA, MHIP, ZORO, CESJ, CATSJ, Conservation Mizoram leh political party thenkhat MPCC, MNF, PC leh AAP ten an thlawp thu an lo sawi tawh bawk a ni.