Indonesia-a Asian Football Confederation (AFC) Futsal Asian Cup 2026 khelh tur zawnna, qualifier-ah India aiawh tura player 14 thlan chhuah zingah Mizo pali an tel.
Mizo telte hi Lalsangkima, David Laltlansanga, K.Roluahpuia leh Jonathan Lalrawngbawla te an ni.
India hian qualifier-ah hian Group A-ah Kuwait, Australia & Mongolia te awmpuiin qualifying round hi September 20-24, 2025 chhungin Kuwait-ah khelh a ni dawn a ni.
National team coach Reza Kordi-a kaihhruai India team hian New Delhi atangin Kuwait an pan ang a, kawng lakah Lebanon-ah friendly an khel ang.
All India Football Federation (AIFF)-in national futsal team a tirh chhuah hmasak berah pawh Mizo player pali an lo tel tawh a, David-a hian India tan futsal-ah goal ruk thun tawhin India tana goal thun hnem ber a ni mek.