Indonesia-a province pahniha sabereka khuangkaih avanga chhiatna thlengah chhanchhuah hna thawktuten ruang hmuh belh zelin mi 15 an thi ta a, mi paruk chin an la hre thei lo.
Thawhtanni atanga ruah sur avangin East Nusa Tenggara province leh khualzinte tlawh tam, Bali-ah lei min leh tui lian a nasa hle.
Chhanchhuah hna thawktute chuan Nilaini khan chhiatna thlen nasatna ber, East Nusa Tenggara-a Nagekeo district-a Maupinggo khuaah nu leh a fa, chirh chhah takin a khuh ruang an la chhuak a. A bul lawka Loka Laba khuaah mipa pakhat ruang an hmu bawk.
Hemi hma hian Mauponggo khuaah hian tui lianin an in a lak avanga an zawn chhungkaw khata mi pathum ruang an lo hmu tawh bawk a, an chhungte dang pali erawh an chin an la hre lo.
Bali-ah chhanchhuah hna thawktute hian Nilaini zan khan an khawpui, Denpasar-a Kumbasari bazar bulah chirhin a chhilh hmeichhe ruang an hmu bawk tih National Disaster Mitigation Agency thupuangtu, Abdul Muhari-a chuan a sawi a. Chin hriat loh hi he thliarkarah hian pariat atangin mi pahnih an ni ta tih a sawi bawk.
Nilaini chawhma lamah khan hmun hrang hrangah ruang pariat hmuh a ni tawh bawk a heng zingah hian South Denpasar-a Mumbasari bazar-a inin a chim hnan mi pali an tel tih Bali-a Search & Rescue Agency hotu, Nyoman Sidakarya chuan a sawi.
Ruah sur nasa hian Bali-a district leh khawpui pakua a tibuai a. Tlang awih atangin chirh, lung leh thing tlu leh lum a tam em em a, tui chim chin sang zelin khaw 112 a tibuai a, lei min a tam hle bawk tih Bali-a Disaster Mitigation Agency chuan a sawi.
Indonesia-ah hian September leh March inkarah ruah a sur nasa thin hle a, hei hian tui lian leh lei min a thlen nasa thin hle a ni.