Aizawl: Mizoram University Registrar, Prof. Lalnundanga chuan NEP hnuaiah Mizo tawng a pawimawh tulh tulh dawn nia sawiin, “University signboard-ah pawh Mizo tawng telh zel turin UGC-in min nawr a ni,” a ti.
Pachhunga University College, Mizo Department-in ni hnih awh ‘Tun hnai Mizo Thu leh Hla Dinhmun: Hawi Lam leh Sukthlek’ an buatsaihah khual lian, Prof. Lalnundanga chuan sorkar laipui, Ministry of Education chuan tunhma chuan University signboard te chu Hindi leh English-a ziak turin an ti thin a, NEP 2020 a lo chhuah hnu hian mahni hnam bil tawng telh zel tawh turin an ti a. Hindi, Mizo leh English-in signboard pawh siam zel a ngaih tawh thu sawiin, “Mizo department leh Mizo tawng hi a pawimawh tulh tulh dawn,” a ti.
Seminar hi PUC Seminar Hall-ah buatsaih a ni a, hawnna inkhawm hi Dr. Lalnunpuia Renthlei chuan a kaihruai a, Principal Dr. H. Lalthanzara, Prof. KC Lalthlamuani, Head, Department of English and Culture Studies, Mizoram University, Seminar Coordinator Dr. Enid H. Lalrammuani, Assistant Professor leh Dr. H. Laldinmawia, Mizo Department HoD ten thu an sawi bawk.
Seminar-ah hian lehkhabu chhuah chungchang te, Machine translation hmanga Google translate-a Mizo tawng telh chungchang te, Artificial Intelligence-in Mizo thu leh hla a nghawng dan te, Mizo thu leh hlaa LGBTQ chungchang lo lang te, Mizo hlaa mahni nun bunruahna te, Mizo film hmasawnna leh Mizo film-a inbiakna tawngkam lo lang te zir chian a ni dawn a. He zir chiannaah hian Mizoram chhunga mithiam hrang hrang bakah IIT Gandhinagar atangte, University of Bern, Hochschulstrasse, Switzerland atangtein mi thiam an kal khawm a ni.