Season thara Mizorama pro division club-te inelna hmasa ber, MSSC Golden Jubilee Celebration MVA Season Opening Tournament khelh mek chu Zirtawpni zan hian final khelh a ni dawn ta a. Hmeichhiaah Chhinga Veng Spikers leh Tuichangral Volleyball Club intumin mipaah Anastasia Electric Veng Volleyball Club leh Khawbel Volleyball Club an intum dawn.
Group stage an khelh zawh hnuah hmeichhe semifinal hmasa zawkah Nilaini khan Chhinga Veng Spikers chuan Eric Pautu Academy chu 3-1-a hnehin final an lo lut tawh.
A hnuhnung zawkah Ningani khan YMA Indoor, Electric Veng, Aizawla khelhah Tuichangral hian Games & Sports Association, ITI Veng, Aizawl chu 3-1 (23-25, 25-7, 25-19, 25-4)-a hnehin final an lut.
Hmeichhe final hi Zirtawpni tlai dar 04:00-ah Electric Vengah khelh a ni ang a.
Ningania mipa semifinal khelhah Anastasia Electric Veng chuan Hunthar Volleyball Club chu 3-0 (25-19, 25-23, 25-18)-a hnehin final an lut hmasa a. Khawbelin Tuichangral 3-0 (25-18, 25-18, 25-20)-a hnehin final an lut zui bawk.
Mizoram Volleyball Association (MVA) buatsaih inelna kal mekah hian mipa hi Pool A leh B-ah team thum ve ve awmin pool khata awmte an inkhelh kual hnua a hniam ber ve ve, Sihphir Volleyball Club leh Chhinga Veng Spikers an tla a, a sang pahnihin semifinal an lut.
Final inbeng thleng ta, Anastasia hian Pool B-ah Chhinga Veng Spikers (3-1) hnehin Khawbel lakah 3-0-in an lo tlawm tawh a, pahnihna niin an tlang ve a. Final-ah hian an lo hneh loh tawh an tum nawn dawn a, phuba lak theihna remchang an nei dawn.
Khawbel hian Pool B-ah tho Anatasia an hneh bakah Chhinga Veng lakah 3-1-a chak bawkin a sang berah awmin semifinal an lut a, final an inbeng thleng zui.
Thawhtanni atanga Tuikual Indoor Stadium, Tuikual North, Aizawla inelnaah hian pro division-a mipaah club pasarih awmah Thutak Nunpuitu Team (TNT) Volleyball Club tih loh inlan vekin hmeichhe team li an inlan kim bawk.
- MSSC Golden Jubillee, MVA Season Opening Tournament 2025
Day 4 @ YMA Indoor Stadium, Electric Veng
Women’s Semi Final
Tuichangral bt GSA, ITI Veng (3-1)
(23-25, 25-7, 25-19, 25-4)
Men’s Semi-final
Anastasia Electric Veng bt Hunthar (3-0)
(25-19, 25-23, 25-18)
Khawbel VC bt Tuichangral (3-0)
(25-18, 25-18, 25-20)
September 12, 2025 (Zirtawpni)
Women’s Final (4:00 pm)
Chhinga Veng Spikers Vs Tuichangral VC
Men’s Final (8:00 pm)
Anastasia Electric Veng VC Vs Khawbel VC