Indian airline-te chu Ningani atang khan Nepali khawpui, Kathmandu-ah dan pangngaiin an thlawk leh tan a. Air India leh IndiGo chuan Nepali khawpuia buaina chhuak avanga Indian tangte hruai haw turin thlawhna a tirh belh dawn bawk.
Kathmandu-a Tribhuvan International Airport hi Nilaini zan atang khan hawn a ni a, Thawhlehni atang khan mipui lungawi lohna lantirna nasa tak avangin khar a ni.
Airline-te chuan Kathmandu pan tur thlawhna hi Thawhlehni leh Nilaini khan an thulhtir vek.
Civil Aviation Minister K Rammohan Naidu chuan Nilaini khan Air India leh IndiGo-ten Kathmandu-a tangkhangte hruai haw turin thlawhna an tirh belh dawn thu hi a sawi a. Minister hian airline-te chu a chuan man tidanglam lo turin a ngen bawk.
Air India chuan Nilaini zan khan Delhi leh Kathmandu inkara a bika thlawka tangkhangte hruai haw tur bik chu Ningani leh Zirtawpniah an tir dawn tih an puang nghal.
“Tih dan pangngai anga kan thlawh thin pawh Ningani atangin kan chhunzawm ang a. Kan passenger-te tana hma an laknaah sorkar leh agency dangte chungah kan lawm hle a ni,” tiin X-ah an tar lang.
IndiGo pawhin tumhmun hawn a nih hnu lawkah Kathmandu-a lut leh chhuak thlawhna dan pangngaia an kaltir lehnghal thu X-ah an tar lang ve bawk.
Nilainiah khan Air India, Air India Express, IndiGo leh SpiceJet chuan Kathmandu-a an thlawhna lut leh chhuak tur zawng zawng chu tumhmun khar avangin an thulhtir vek tih an lo sawi tawh hlawm a ni.
Nepal-ah hian kar hmasaa sorkarin social media hman hlawh tak tak 26 a khap avangin thalaiten duh lohna lantirin Thawhtanni khan an pungkhawm a, buaina nasa tak chhuakin mi 19 an thi a. A tukah chhunzawm lehin a aia nasaa chein parliament building hial pawh an luhchilh a, an hal a, politician-te chenna in an suasam bawk.
Thawhtanni zana social media khapna hlih a nih hnu leh Prime Minister KP Oli-a a bân hnuah Nilaini atanga boruak ziaawmin sipaite khawlaiah an patrol a, Ninganiah kha chuan boruak pangngai tak a awm leh thei tawh a, an ram inrelbawlna erawh an insiksawi nual dawn nia ngaih a ni.
New Delhi chuan a thenawm rama mipui thinrim chetna avanga thil thleng thut hi a ngaihven hle a, ramri pawh uluk lehzualin a ven phah.
Indian sorkara hotu sang pakhat chuan Nepal nen hian an inkawmngeih a, muanawm taka an buaina chin fel chu India hian a duh ber tih India Today TV-in a kawmnaah a sawi a. Tan bik pawh a nei lo va, mi ram chhung thila inrawlh pawh a duh lo tih a sawi.
Indian intelligence agency-ten thil thleng mek thlithlai rengin India himna atana hlauhawm thei a awm em tih an ngaihven a. Sashastra Seema Bal (SSB) chu Nepal nena an inrina, a bik takin Birganj-Raxaul leh Kakarbhitta-Siliguri chu veng uluk lehzual tura tih an ni.
India hian buaina karah hian kan kai a duh lo va, a bikin ramri kana ruihhlo leh ralthuam tawlh te, lehkha lem leh pawisa lem thlenga tihdarh a hlau hle niin sorkar hotu chuan a sawi.
Indian sorkar hian Nepal-a ram dang mi tangkhangte pawh a pui mek bawk a, him taka buaina an chhuahsan theihna tura puiin chhuah dan tur a dappui bawk.
Hetih mek lai hian New Delhi hian Kathmandu-in Beijing lam a hawi dan pawh a thlir reng bawk a, Nepal-ah hian Chinese huhang a na hret hret zel a, hei hi India chuan a ngaihven em em reng a ni.
Prime Minister Narendra Modi-a chuan Thawhlehni khan Nepal-a tharum thawhna nasa tak a thleng chu pawi a tih thu sawiin mipuite chu inbengdai turin a lo ngen tawh a ni.