BJP Mizoram State President Dr. K. Beichhua chuan Prime Minister Narendra Modi-a’n Sairang rel station a hawng tur chu a ropui a, state dangte ruala hmasawnna rahbi Mizoramin a nei thei ve ta chu a lakah Mizo mipuiten lawm thu an sawi tur an nih thu a sawi.
Ningani khan BJP pisa-ah thu thar thehdarthtute kawmin Mizoram BJP President Dr K Beichhua chuan hmarchhak state kilkhawt taka awm, Mizotam tana PM-in rel station a hawng tur chu, Mizoram mipuite pawh lawm lo an awm an rin loh thu sawiin, “Hetianga state dangte ruala hmasawnna rahbi thar Mizoramin kan nei thei ve ta hi a lawmawm hle,” a ti.
Siaha bialtu MLA ni bawk, Dr K Beichhua chuan Bairabi leh Sairang inkar rel kawng hi kum 11 chhunga thawh zawh a ni a, he rel kawng hian Mizoram dinhmun chawikangin, inkalpawhna leh ei leh bar bakah thil dang dangah hma a sawnpui dawn tih a sawi.
Prime Minister Modi chu fak lo thei an ni lo tih sawiin BJP MLA Dr K Beichhua chuan, “BJP ni lo pawhin Pu Modi hi tha lo ti an awm a rinawm loh. Hriselna leh zirna kawngah pawh hmasawnna kan nei chho dawn a. PM ngeiin a rawn hawng tur hi a ropui kan ti lehzual a. Hruaitu tha, hmasawnna min petu kan nei hi India leh Mizoram mipui pawh lawm tur kan ni a. BJP pawhin zui tur dik tak kan zuiin kan hria a. Mizo mipuite hian hma an sawn duh chuan an thil thlir dan an thlak a ngai, tuna an thil thlir dan hi a dik tawk lo,” tiin, Mizoram mipuite pawh hetiang anga ram hmangaihtu leh hruaitu tha zui turin a sawm tih a sawi bawk.