Aizawl: PWD leh YMA in Mizoramin kawngpui tha a neih theihna tura thawhhona thuthlung an ziah chungchang an sawi ho.
Ningania Central YMA Hall-a an inkawmna hi PWD E-in-C H. Zoramliana leh Central YMA President Lalhmachhuana te’n an kaihruai.
PWD H. Zoramliana, Engineer-in-Chief chuan Mizoram chhunga inkalpawhna kawngpui tha a neih theihna tura PWD leh YMA thawhhona a tha a. Hetihrual hian PWD in kawngpui enkawl an ngah leh sum indaih lohna avanga duhthusama enkawl theih a nih loh avangin YMA te thawhpuina an mamawh thu a sawi. MOU an ziah avanga hmun tam takah hmasawnna leh kawngpui siam kawnga awlsamna an hmuh thu a sawi bawk.
Central YMA President Lalhmachhuana chuan YMA ten kawngpui siamte pawngpaw sawisel mai lova MoU ziah anih avanga tawiawm tur leh thawhpui tur an nih dan te, sawisel tul a nih chuan huai taka sawisel a tul thu leh en pui zel turin YMA hruaitu kalkhawm te a chah a. PWD nena thawhhonaah theihtawp chhuah a kawngpui tha a neih theihna tura hma la turin a chah bawk.
He hunah hian Sub-Hqrs YMA, Group YMA leh Branch aiawh te an kalkhawm a. Zoram hmun hrang hranga kawngpui siam chungchanga harsatna leh kawngpui chhia chungchangte sawiho leh inhrilhfiahna hun hman a ni bawk.
YMA leh PWD te hian kum 2018 atang khan thawhhona thuthlung an lo ziak tawh a, kum 2022 ah ziah thar leh a ni a, August 8,2025 khan kum thum chhung atan MoU hi ziah thar leh a ni.