AZL: ZPM Dampa bial by-election campaign committee huaihawtin nimin piah leh nimin khan Rural Development Minister Prof. Lalnilawma, ZPM Vice President C. Lalnunnema leh Dampa bial ZPM candidate Vanlalsailova ten Dampa bial chhunga khaw hrang hrang an tlawh.
Dampa bial ZPM unit tlawh chhuahnaah Prof. Lalnilawma chuan ramin hma a sawn zel a, hmanlai politics inbeihna ang kha an kalsan zel tih sawiin, “Mipuiin rilru fim tak nen thu dik zawk hriat kan tum ta zel a, hei hi thil lawmawm a ni. Politics a nih avanga dawt leh thu dik tluantling lo hmanga inbeih hian ram a siam tha lo a, mipui rilru a dik lo zawnga hruai kawi tumna a nih avangin kalsan a ngai,” a ti.