Aizawl: Mizoram Pradesh Youth Congress Committee (MPYCC) chuan Congress kaihhruai sorkar liam tain Mizoram mipui himna dah hmasa chunga Mizoram mipui hmasawnna leh zangkhai phahna tura Sairang thlenga rel kawng a lo buatsaih chu lawmawm an tih thu an sawi.
Congress Thalai chuan nimin khan Sairang rel kawng hawn tur chu an tlawh a. MPYCC President Laltawnliana chuan rel kawng chu Mizoram hmasawnna atana pawimawh, kuthnathawktute thlai thar awlsam zawka hralh chhuah a nih theih nan te, Mizoram mamawh state pawn atanga man tlawm zawka lak luh theih nan te, zin veivah awlsam leh man tlawm zawka zin a nih theihna tura mellung pawimawh tak Congress kaihhruai Mizoram sorkarin a lo buatsaih lawk chu Mizoram mipui tan thil lawmawm tak a ni, a ti.
Laltawnliana chuan Congress kaihhruai Mizoram sorkarah khan Sairang thlenga rel lo lut tur hian Mizoram tan hlawkpuina tam tak a neih turte uluk taka zirchian hmasak lawk vek a nih thu sawiin, India ram leh khawvel hmun danga rel an hman tangkai dan leh Mizoram mipui himna tur ni bawk siin he ruahmanna hi kalpui a nih thu a sawi a. Bairabi leh Sairang inkar rel tlan tir anih theih nan hian Central-a Congress sorkar laiin hmalak a nih thu leh, Act East Policy hmalakna chhunzawmin Sairang bakah Hmawngbuchhuah thlenga rel tlantir tura ruahman leh hmalakna kalpui a nih thu a sawi bawk.