- Zoliansanga Tlau
- Theology chu
Dictionary of Theological Terms (Revised & Enlarged – 2017, p. 392 – 393)-in Theology a hrilhfiah dan chuan, “Theology tih hi Grik thumal pahnih ‘theos’ leh ‘logia’ atanga lak chhuah a ni a, ‘theos’ tih chu Pathian tihna a ni a, ‘logia’ chu ngaihtuahna fim (reason) hmanga thuril chhuina emaw, sawi fiahna emaw, zirna emaw tihna a ni. Tichuan, Theology chu rilru leh ngaihtuahna fim hmanga Pathian thu zirna leh sawi fiahna tihna a lo ni a…Theology chu Pathian chungchang te, Pathian leh a thiltih te, a bikin mihring leh thilsiam khawvel nena a inlaichinna te, miten an hriat dan zu zir chianna leh midangte hriat thiam theih tura awmze nei taka sawi fiah tumna hi a ni.” tiin a inziak a.
Rev. B. Zirsangliana’n Theology chu, “Greek tawnga theos (Pathian) tih leh logos (thu) tih atanga lo chhuak a ni a. ‘Pathian chanchin zirna’ tihna a ni mai a. Hei hi kohhran hmasa hun laia an theologian-te hrilh fiah dan pawh a ni fo thin. A Greek tawng lamah chuan Plato leh amah zirtirtu, Socrates te pawh khan theologia tih hi Greek-ho Pathian te (gods) chungchang sawi nan an lo hmang daih tawh a. Kohhran hmasa hun laia hruaitu, Clement of Alexandria leh Origen te hun lai atang khan Theology tih tawngkam hi Trinity chungchang leh Lal Isua chungchang sawina atan an lo hmang chho daih tawh a ni. Athanasius a chuan theologia chu mihringin Pathian kan hriat dan (knowledge of God) hi a ni mai a ti a. Augustine a pawhin Pathian chungchang sawina bikah a dah a, hetiang tho hian Medieval theologian, Thomas Aquinas pawh khan Pathian chanchin zirna (Science of God) tiin a hrilh fiah…Peter Abelard a khan Theology chungchanga a ngaih dan a sawinaah chuan ‘ka rin hmain ka hre chiang hmasa tur a ni (I must understand before i can believe)’ a ti a. St. Anselm ve thung chuan Theology chu ‘Rinna atanga Pathian hriat chian tumna (Faith seeking understanding)’ a ni tiin a hrilh fiah thung…Theology chu Pathian nihna leh a hnathawh chungchang te, a thil siam tin rengte nen a inlaichinnna te leh mihringin a laka kan mawh phurhna chungchang zawng zawng te hi a ni. Hei vang hian zirna kawng hrang hrang: History, Science, Philosophy, Sociology, anthropology etc. te hi a keng tel nghal vek a ni kan ti thei ang.” a ti a. Amah vek hian, “Theology chu Pathian hriatna leh rinna (Faith) atanga intan a ni. Theology chu mihringin a finna leh hriatna atanga Pathian chungchang a zirna a ni satliah mai lo. Chuvangin, Theology intanna pawh mihringin Pathian a rinna leh a taka a hriatna (Faith-experience) hi a ni thin. Hei vang hian heng, sociology of religion, anthropology of religion, philosophy of God etc, te hi Pathian hriatna (Faith experience) atanga tih an nih lem loh avangin Theology a tih theih loh” (Theology Kalphung Hrang Hrang te, 2011, p. 1 & 2) a ti bawk.
Theology hi thu dik ding reng, danglam thei lo leh danglam ngai lo ni lovin, a hun leh hmun a zira danglam thei leh danglam thin niin alang a. “Eng theology mah hi a tawpna leh famkimna (final theology) anga sawi theih a awm lo. Mamawhna leh tulna avanga chher thar leh siam thar zel a ni. Chung zingah chuan tun laia langsar deuhte chu Minjung theology, Dalit theology leh Tribal theology te hi an ni. Hengte hi contextual theology an ni a, liberation theology (chhanchhuahna theology) anga sawi an ni bawk” (Dictionary of Theological Terms-393). Hetiang a nih avang hian, “Patristic period (Kohhran hmasa hun lai), Medieval period (Hun laihawl), Reformation (Kohhran siamthatna hun) hun laia Theology kalpui dan a inang vek thei lo va. Englightenment hun laia Theology te leh kum zabi 20-na hnu lam a Theology te pawh nasa takin a danglam a ni” (Theology Kalphung Hrang Hrangte-10) a ni.
- Theology-in a tum chu
- Pathian thu (Bible)-in a tum dik tak kan hriat fiah a, keimahniah theuhah awmzia leh nghawng ?ha a neih theih nan leh Pathian thil tum tih famkim a tih hlawhtlin a nih theih nana hrilh fiah hi theology-in a tum a niin a lang a. Tin, hman laia thu ziak chu hman laia mite tana a fiah ang bawkin tunlai mite tan pawha a fiah theihna tur leh hriat thiam theih tura buatsaih leh sawi fiah chu a tum a ni bawk ang. Hei vang hian theology chu hrilh fiahna (hermeneutics) a ni tiin an sawi thin reng a.
- Bible ziaktute’n Pathian leh a hnathawh an dai hriata an tawn hriat (Experience) leh an hmuha an thlir dan chu Bible-ah an ziak chhuak a. Chu chu tun hunah, tunlaia mite’n kan hun tawn leh nunin a dai hriat suih fina suih zawmin kan han chhiar a, awmze thar a lo piang chhuak thin a ni. Hei vang hian theology chu thu ziaktu thu ziah leh a chhiartu infin khawmna (Fusion of horizons) tiin sawi a ni bawk. Chumi suih fin-a awmze ril leh ?ha bakah tunlai mite tana hrilh fiah leh sawi fiah chu a tum bawk tiin a sawi theih ang.
- Pathian nihna sawi fiah leh hrilh fiah a tum bawk, hei hi a tum bulpui ber a ni hail nghe nghe ang. Theology duanna tura thu laknate chu – Bible, tradition (dan inhlan chhawng, thuro chhiah chhawn, kumkhuaa thil lo chin thin – JF Laldailova), Pathian inpuan chhuahna – thilsiam, inlarna (Revelation), Chhia leh tha hriatna leh rilru fimna (Reason), dai hriata tawn hriatna (Experience) leh a dangte a ni ang (Theology Kaphung Hrang Hrang Te, p.3-9).
- Philosophy chu
JF Laldailova’n “Thil bul chhuina” tia Philosophy a lo hrilh fiah hi Grik tawng Philos (hmangaihna) leh Sophia (finna) atanga lak niin Finna Hmangaihna (Love of Wisdom) tihna a ni a (Finna Thlifim: Philosophy & Theology Bu Sen, 2024, p.26), Dictionary of Theological Terms (p. 292)-ah chuan Philosophy chu “Finna, finna thuril, finna zirna. Grik tawng ‘philea’ leh ‘Sophia’ atanga chhuak a ni. Phileo awmzia chu hmangaihna tihna a ni a, Sophia awmzia chu finna tihna a ni. A tobul ang taka philosophy hi hrilh fiah dawn chuan finna hmangaihna tih tur a ni ang. Mihring nun vuak veta thil inhnawmhnawih zawng zawng, a te ber atanga a lian ber thleng hriat fiah kelh tumna a ni” tiin a inziak bawk. Philosophy chu (Love of wisdom) ‘Finna hmangaihna’ tih ai chuan ‘Finna ngainatna’ tiin Mizo tan chuan a fiah zawk ang. Philosophy tih thu mal hi Grik mi fing Pythagoras-a chher chhuah a ni nghe nghe a. India-ah chuan Philosophy chu ‘Darsana’ – hmuhna, lanna, thlirna tiin a sawi ve thung. English-a ‘worldview’, German thumal ‘weltanschaaung’ tih atanga lak – hmuh dan, thlir dan tih nen pawh a inhnaih hmel hle.
Rene Descartes-a’n, “Philosophy chu thingkung ang hi a ni a, metaphysics leh epistemology te hi a zung niin, logic chu a kung, ethics, aesthetics leh politics chu a zar te an ni” a lo tih ang deuhin Philosophy hi chi li-ah a then theih ang – ‘Epistemology’ (Hriatna chungchang zirna), ‘Axilogy – Ethics and Aesthetics’ (Thil hlutna zirna – Thil dik leh dik lo leh thil mawi zirna), ‘Logic’ (Ngaih dan mumal tak leh innghahna mumal tak nei tura zirna), ‘Metaphysics’ (“Khawvela tisa hriatnaa kan khawih theih bak zirna/Leilung bul thut chhuina”- Fianrial Thuril – 29) tiin. Heng bakah hian ‘Philosophy of Language’ (Tawng nihna leh hnathawh zirna), ‘Philosophy of Mind’ (Rilru leh ngaihtuahna chungchang leh khawvel thil nena a inkungkaihna chungchang zirna), ‘Philosophy of Religion’ (Sakhaw chunchang zirna), ‘Philosophy of Science’ (Science kaihhnawih thil nihna bulthut, ngaihruatna leh buaina chungchang zirna) leh ‘Political Philosophy’ (Politics chungchang leh vantlang chungchang zirna) te pawh a la awm. William Heard Kilpatric-a’n, “Philosophy chu khaw thlirna niin nun chungchang thlirna a ni” a lo ti a, Dr. Sarvepalli Radhakrishnan-a paw’n, “Philosophy chu nun thlirna a ni a. Nun kawng dik a kawh hmuh bakah nun dan tur a duangin a ruahman a ni” a lo tih leh Johann Gottlieb Fichte-a’n, “Philosophy chu hriatna zirna a ni” a lo tihte hian Philosophy nihna chu a tar lang ruak thei ang.
Philosophy hian Pathian awm leh awm loh a fin fiah thei lo va, chutiangin Science pawhin a thei hek lo; mahse, Philosophy chuan thil nihna a sawi fiahin a hrilh fiah thei thung a ni. Tuna Science kan tih pawh hi Philosophy huanga Natural Philosophy/ Philosophy of nature an tih thin atanga lo zi chhuak chho a ni a. Science nih phung chu Science vekin a chhanna a hrilh fiah theih loh avangin Philosophy hmanga sawi fiaha hrilh fiah a ngai ta a ni. Hei vang hian Philosophy chu thil sawi fiahna atana pawimawh em em a ni a. Chutih rual chuan thil sawi fiahna atana tha famkim erawh a ni bik chuang lo tih kan hriat a tha ang. Mihring finna hmanga thu dik zawnna a ni ve mai a. Tin, Philosophy hi Theology kan sawi ang tho khan a hunlai boruak leh thil thlengin a hrinte a ni thin bawk. Philosophy chuan mihring hriatna chu – Rationalism (Hriatna leh thu dik chu ngaihtuahna fim [reason] hmang chauhva hriat theih a ni tih rinna) leh Empiricism (Hmuh, khawih, tawn, tem, rim leh beng hmanga hriatna chu hriatna bul ber a nih tih rinna)-ah te a ?hen a, hei lo pawh hi a la awm tho nachungin a hlawm lianah chuan heng pahnihte hi a ni a tih theih ang. Theology ang lo takin Philosophy chuan innghahna pawm chian sa bik a nei hran lo va, innghahna tur chu innghahna tlak a nih leh nih loh a zawnga, a chhui bakah sawi fiah a tum zawk a ni ber ang.
- Theology leh Philosophy chu
Tertullian-a (c. 160-225) khan, “Athens leh Jerusalem te hian eng nge inzawmna an neih? Zirna leh kohhran inkarah hian eng inremna nge awm?” (What has Athens to do with Jerusalem? What concord is there between the academy and church)” tiin a lo sawi a (The New Dictionary of Theology-760; De Praescriptione Haereticorum, ch.7). Dr. Krista Roluahpuia chuan Tertulliana thu sawi hi sawi chhun zawmin, “Hemi avang chauh pawh hian sawisel a hlawh nasa viau. Heta a sawi chhun zawmna an tih lan tawh ngai lem loh chu: ‘Kal sual leh Kristiante chuan eng nge inlaichinna an neih?’. Tertullian khan finna kha a do ngawr ngawr a ni lo va. A hmang sualtute kha a va bei zawk ni berin a lang a ni…A chian em emna chu monastery din pawimawhna ngaihtuah chhuaktute kha Irenaeus leh Tertullian te pahnih hi an ni daih a ni.” (Kristianna leh Science: A Indo Em-66) a ti.
Grik mi fingte an lo lan atangin Philosophy a rawn thang duang a, hei hian Science a hring a. Kristianna a lo lan hnuah pawh Theology leh Philosophy hi a kal kawp a. Kristian hmasa Alexandria, Irenaeus, Origen leh Augustine-a te khan Plato-a Philosophy hmangin kristian thurin an sawi fiah ?hin a. Augustine-a chuan rinna leh finna, ngaihtuahna ril (reason) chu inrem taka kal dun turah a ngai a ni ang, ” I hriat thiam theih nan ring rawh (Believe, in order that you may understand)” a lo ti a nih kha; rinna dah hmasain thuk taka hriat thiam nan a dawtah mihring finna a dah niin a ngaih theih. Hetiang chiah hian Anselm-a pawhin rinna leh finna a dah pawimawh kawp a, “Ka rin theihna turin hriat thiamna ka zawng lo va, ka hriat thiam theihna turin ka ring a ni” a ti (Kristian Apologetics-18). Thomas Aquinas-a khan khatih laia Islam sakhuain Aristotle-a Philosophy a rawn chawi lar hmang ?angkaiin Aristotle-a Philosophy hmangin kristiante kawng mumal tak a rawn kawh hmuh a; ani Platonism leh Aristotelianism thiam taka suih zawmtu a ni nghe nghe. Peter Abelard-a kha Grik finna leh Theology thlun zawma suih finna – Scholasticism theh darhtu hmasa a ni bawk (Bible Chronology-121). P.C. Lalropuia chuan, “Medieval hun lai chuan thil zirna (science) peng hrang hrang zingah theology hi ngaih ropui ber a nih thin avangin Medieval theologian ropui Thomas Aquinas-a chuan ‘Queen of all Sciences (Zirna zawng zawnga ropui ber/zirna zawng zawng lanu)’ tiin an sawi a” (Kristian Apologetics – 28 & 29) a ti a. Siam?hatute zingah Martin Luthera chuan, “Chhia leh ?ha hriatna leh rilru fimna chu Diabola nawhchizawrhna ropui ber a ni a; a nih phung leh awm dan rengah pawh nawhchizawrhna ?ha lo tak a ni” a ti hmaih mai. Immanuel Kant-a kha chuan, “Rinna ka neih theih nan hriatna chu ka hnawl a ngai a ni” a lo ti bawk. Soren Kierkegard-a phei chuan, “Hlauhthawnna tel lo chuan rinna a awm thei lo va. Rinna chu mi mal chhungril lama duh thu sam tawp chin nei lo leh thil chiang lo inkara inhnialna leh inkalhna fir tak a ni” a ti hial bawk. Friedrich Nietzsche-a chuan Philosophy leh Theology chu inperhsan tak thil leh theology innghahna Pathian phei chu thi tawh angin a sawi hial a – “Pathian a thi tawh a, Pathian chu a thi reng tawh a ni. Keimahni’n kan that ta a ni” a mauh mai! Hemi chungchang hi Rev. B. Zirsangliana chuan, “Friedrich Nietzsche hian Pathian chu a thi tawh a han tih hian a sawi tum tak hi mi tam takin an hre sual fo ?hin. Friedrich Nietzsche hian a sawi tum ber chu Europe ramah sakhaw lam thila thurin leh puithuna te hian mi rilruah awmzia a nei tawh lo a tihna a ni a…Nietzsche ngaih danah chuan mihring hi Pathian tel lovin a awm thei a. Pathian thua kan rinna leh rilru zawng zawng kan lak kian hunah mihring finna leh theihna chu nasa taka chher chhovin a awm dawn a ni a ti a ni” (Theology Kapphung Hrang Hrang Te – 154) a ti. Karl Barth-a chuan Liberal Theology leh Natural Theology dodalna ziakin, “Pathian chu amah Pathian leh Pathian vek kal tlang chauhvin a hriat theih a ni” tiin Philosophy aiah Theology a dahsan thu a ziak nia ngaih theih turin thu a chheh a. Paul Tillich-a ngaih dan chuan, Philosophy chuan thil bul chungchang a zawt a, theology erawh chuan rinna hmangin zawhna a chhang ?hin niin thulai la zawngin ngaih dan a nei a ang hle.
Eng pawh ni se, Theology leh Philosophy te ngaihven zawng leh buaipui zawng chu inzul chang a neih avangin parallel line angin an kal thiang niin a ngaih theih a. Parallel line chu rin pahnih inkar zau zawng inang leh insi ngai lo tur a ni nachungin Parallel line pawh chu a chang chuan danglamin rin pahnih insi tep anga awmin a chang chuan a intawk hial ?hin a, a changin an kal hrang bawk a. A chang leh an inkalh rap rap thin niin a lang bawk. A hnuaiah hian Theology leh Philosophy inlaichinna, danglamna leh inperhsanna chungchang tlem kan tar lang ang:
- Theology chuan inpuan chhuahna (revelation) hmangin zawhna a chhang a, Philosophy chuan thutak pum hlum (ultimate truth), thil nihna (meaning) leh chet dan dik leh dik lo thliarna (morality) hmangin zawhna a zawt thung.
- Theology chuan a rin hre thiam turin a zir chiang a, Philosophy chuan a rin leh rin loh pawh a nihna tak chhuiin a zir chiang thung.
- Philosophy chuan fin fiahna leh chhia leh ?ha hriatna hmanga dik a phut tlat laiin Theology chuan thutak chu mihring finna thlawh khuma rinna hmanga hmuh theih niin a ngai thung.
- Theology leh Philosophy chuan an huang theuhah thil nihna tak zir chiang mah se, hrilh fiah theih loh leh sawi fiah theih loh tam tak a nei.
- Bertrand Russell-a chuan, “Philosophy tih thu mal ka hriat fiah danah chuan Theology leh Science inkara tla zep niin ka ngai thin a, Theology huang chhung ang bawkin kan la hrilh fiah theih loh thil tam tak chu a awm a. Nimahsela, Science angin thuneihna aiah ngaihtuahna fim tak chu a chawi sang a ni. Hriatna belh chian dawl (definite knowledge) kan tih zawng zawng hi science huang chhungah dah luh theih a ni a. Chu hriatna belh chian dawl khum thei tura kan chhal ‘a dik leh dik lo’ thlu lova rin ngheh burna’ (Dogmatism) kan tih hi Theology huang chhungah a lut ve thung a ni. Science leh Theology karah hian luah loh ruam zau tak mai a awm a, chu chu ‘Philosophy’ kan tih hi a ni” a tih bakah Philosophy chuan Science leh Theology nihna chu a lak kawp niin a ngai bawk.
- Lalthlanawma chuan, “Theology leh Philosophy inkara ruam awm ve thung chu ‘Apologetics’ kan tihte hi a ni mai ang em” tiin zawhna a siam (Finna Thlifim : 259-261).
- Khaikhawmna
Theology leh Philosophy hi an inkalh emaw an inzawm emaw tiin sawi ngawt a har a ni thei; amaherawh chu, thil che reng hmanga inzawm a ang hle. A chang chuan philosophy hi theology chhiahhlawh (Augustine, Aquinas) angin a ngaih theih a, a changin inkalh (Martin Luther, Nietzsche) angin a ngaih theih leh bawk a. A chang chuan ?hian dun inbiakna (Kant, Kiekegard, Tillich) angin a ngaih theih bawk a; Zawhna awm thei chu thutak chu inpuan chhuahna (Bible, thil siam)-ah, mihring finna (reason)-ah, inbiaknaah hmuh theih a ni em tih hi a ni ang. A tawpah chuan an pahnih inhnialna chuan ?hen hran theih an nih lohzia a tar lang zawk niin a ngaih theih leh lawi a. An inkalh anga a lan lai pawhin an pahnih ve ve hmasawnna tur kawngah kawng an sialsak ve ve niin a ngaih theih deuh si a nih hi.