Aizawl: MNF Sr Vice President Dr R Lalthangliana chuan ZPM sorkar chu tawnhriat la nei mang lo deuh vekin ram an hruai avangin a ngaihna hre lo an awm chu thil awm tak a nih thu a sawi.
Inrinni khan Dampa bial MNF candidate Dr R Lalthangliana’n West Phaileng tlawhin MUP, VC leh party hruaitute nen an inkawmnaah ZPM sorkar-in ram hruai har an ti leh an hruai buai nuai mai hi a awm a tihpui thu sawiin, “Tawnhriat nei mang lo deuh vekin an hruai a, a ngaihna an hre lo hi a awm viau a ni,” a ti.
Dr Thangte chuan, “Pathian leh mipui zarah Dampaah hian ka tling a nih chuan sorkar khalh ngil kawngah tangkaina nei ve turah ka inngai a. Dampa hmasawnna tur pawhin thawh thei nei ve turah pawh ka inngai,” a ti bawk.
Dr Thangtea chuan, “Ka ngaihtuah ngai hauh lovin by-election-ah ka din a lo tul ta a. Kum eng emaw chen politics-a ka awm tawh chhunga ka suangtuah ngai loh thil a ni. Dampa bialtu MLA Pu Lalrintluanga Sailo-in a lo thawh tawh leh thawh mek chhunzawm tur tam tak a awm a. Chumi chhunzawm thei tur chuan an vote hlu tak min pe turin Dampa bial mipuite khawngaihna kan dil tak meuh meuh a ni,” a ti.