- Dr J.T. Vanlalngheta, Writer’s Lexis & Law
Lêng zêm hla saa a hun laia Zoram khawvela lâr ber mai; kei phei chuan, a ni ang tluka lar, naupang, thalai, nu leh pa, pitar leh putar, mi thiamte thlenga duh leh ngainat rawn zai thiam hi Mizoramah an la awm lo ni hialin ka hria; kam hriat ve chhun: Chap Char Kuta a zai ngaithla thalaite an kiu rawi rawi maite khan a zaiin hu-và a ngahziah a ti lang chiang hle awm e. Naupangte’n Vanlalsailova hming chuanna an khim a, an khupahte an bel bawk te kha mit thlaah a la cham reng mai; Zoram khawvela thu leh hla lama kan theihngbilh nhai loh tûr chhuanawm tak (novelist), IAS pa chal ni bawk fam chang tâ Pu Lalhmingliana Saiawia meuh pawh khan Chaltlang Higher Secondary School-a Sailova zai, pawn atanga ngaihthlak a duh vanga huh hnêpa ruah a do thu Vanglaini Chanchinbua a ziah tawh bawk kha
Mizoram Youth Commission Secretary ka nih laiin, MZP leh MYC thawh honaa W.Phailenga Career Guidance kan neih tum khan a mah Sailova hmuh ve ngei tumin an inah ka kal a, mahse, a zin chhuah lai a lo ni hlau va, ka hmu thei ta lo; a pa nen thla te la dûnin hlim takin kan inkawm ta tho kha a ni (Tun thleng hian Pu Vanlalsailova hi hmun leh hmunah ka la hmu lo).
High School kan kai laiin English thawnthua phenglawng (baza) tum thiamin Hamelin khaw naupangte a hruai bo vek thu kan lo zir tawh; sazu puangin a khaw mipui a ti buai lutuk a, an mangang a, sazu rual kha a tih bo theih chuan Baza tum thiam kha lawm man tha tawk tak pek an tiam a; mahse, sazu rual chu a hruai hlum ta chênga, an thu tiamah an rinawm lova, a khaw naupangte a lung awi lovin naupangte a hruai bo tak vek thu kan lo zir kha rilruah a lang a.
Khati tak mai a lenglawng/lengzêm hla sa thiam, amah L.Keivawma’n a Sap tawnga ‘ bewitingly charming and sexy a tih ang chi, mi hîpna ngah tak, duh se chuan Zoram thalaite hruai khaw lo vek thei tur hial khawpa ngaihno beina ngah, hla sak hmanga mihring hîpna bik nei tlangval duhawm tak mai kha a’n piang tharin dam chhunga Lalpa rawng bawl nan a nun a lo hmang ta zawk hi khawvel ngaihah chuan thil mak leh ropui tak a ni. Dik tak chuan, zai atanga hlawkna tur namen lo a hmaa lo awm kha ‘Nun Krista’ a lo neih tak avangin channaah ngai lovin hlawknaa a lo ngai thei ta kha a ropui hle a, thalaite tana icon/idol tling a ni. Love song hla a sa chhunzawm lo ringawt pawh hi Mizoram thalaite tana mal sawmna tling a ni tawh.
Thuthlung Hlui hun atanga Pathianin ro relna fawng vuan tura a mi Israel fate a duhtuizia kan hria a; heti zawnga ngaihtuah chuan Sailova hian ro relna thut phaha thut hi a phu. Pu Sailova hian duh se chu a tlangval lai khan nuam taka khawvel chen thei a ni asin le. Chu khawvel nawm chenna, hausakna leh ropuina chu a kalsan a, tlangval senior tak a nih hnuah nupui pawh a nei ta chauh a ni. Hetiang mi entawn tlâk, nun zîktluak tha tak mai nei, Krista avanga hausakna leh ropuina zawng zawngte chan ngamtu hi (ro reltute hi Pathian ruat an nih miau avangin) ram ro relna hmanga thalaite nun siam tha zui zel tur leh mi retheite dâwm kang tur hian Lalpa’n a rawng bawlna her danglamsak hretin, chutiang hna thawh nana thu neihna tam zawk nen chuan kawng dangin rawng a bawl chhunzawmtir zel dawn niin a lang a, Lalpa’n a kawng pawh a tih ngilsak zel ang tih kan ring.