Hun kal tawha thil hriatreng chungchang sawihonaah US President Donald Trump-a’n Guns N’ Roses chu ‘November Rain’ music vangin a fak nasa hle a, music video ropui berah a chhal.
Thil pakhat i hriatreng tur chu- a term hmasa atang khan Donald Trump leh Guns N’ Roses vocalist Axl Rose te inkarah tawngkam na tak taka inbeihna a awm. November 2016 khan Rose hian U.S. attorney general thlan chungchangah Trump a lo sawisel chiam tawh a, hemi hnu hian ngaiawh hlei thei tawh lovin an inhmu sakhi zui viau.
Hun a kal zel a, Axl Rose-a’n Mexico City-a concert an neihah Trump lem lian deuh chu phochhuakin, fiamthu thawh nan a hmang zui. 2018 kum tawp lamah California-a kangmei nasa tak chhuah chhanah Trump chu a kaikuangah a puh zui a, climate change ngaihthahah a beizui bawk.
US President a nihna anga mawhphurhna hlen tâwk lovah a bei chhunzawm a, politics thila an inbeihna leh indeusawhna nasa tak karah Trump hian ‘November Rain’ music video vangin Guns N’ Roses hnenah lawmthu a sawi tlat mai si a ni.
White House press secretary hlui Sarah Huckabee Sanders chuan ‘Speaking For Myself: Faith, Freedom, And The Fight Of Our Lives Inside The Trump White House,’ tih thupui hmanga sawihonaah a lehkhabu ziah atangin he thu hi a thurchhuak a ni.
Sarah-i hian 2018 khan Trump-a’n a hla duh ngawih ngawih thlankhawm playlist-ah ‘November Rain’ a dah chungnung hle. Oval office-ah midangte nen Guns N’ Roses video hi an enho fo thin a, ‘Greatest music video of all time’ a ti, niin a ziak.