Prime Minister Narendra Modi-a chuan Pathianni khan Assam-a Darrang leh Golaghat district-a hmasawnna ruhrel din hrang hrang, Rs vaibelchhe 18,500 chuang sennate chu a hawng.
Mangaldai-ah Rs vaibelchhe 570 senga Darrang Medical College, nursing college leh GNM school dinna tur lung aphum a. Rs vaibelchhe 1,200 senna, Narengi–Kuruwa lei leh Rs vaibelchhe 4,530 senna, Guwahati Ring Road project, Kamrup leh Darrang district leh Meghalaya-a Ri Bhoi district inkalpawhnate a hawng bawk.
Prime Minister Modi-a hian ni thum chhungin Mizoram, Manipur, Assam, West Bengal leh Bihar a tlawh mek a, India hmarchhak leh khawchhak lama hmasawnna ruhrel din hrang hrang hawngin hna thawh hmabakte bul tanna a hmanpui bawk.
Inrinni khan Modi-a hian Mizoram tlawhin Aizawlah Rs vaibelchhe 9,000 senna tur leh sen tawhna thil dinleh lungte a phum a. Manipur pan nghalin Churachandpur-ah Rs vaibelchhe 7,300 senna tur hmasawnna ruhrel dinna tur lungte phum a, hei hi kum 2023-a chi leh chi inkara buaina a chhuah hnua a tawh hmasak ber a ni.
Prime minister hian Inrinni tlaiah Guwahati thlengin Assamese rimawi, thu leh hla leh nunphung chawi nungtu, Bharat Ratna awardee Bhupen Hazarika-a piancham kum 100-na lawmna huna hmanpui nghal.
Pathianni khan Golaghat district-a Numaligarh-ah Rs veibelchhe 5,000 senna mau atanga ethanol siam chhuahna tur hmun, 50 KTPA fuel-grade ethanol siam theihna tur a hawng a. Rs vaibelchhe 7,230 senna tur, Petro Fluidised Catalytic Cracker Unit dinna tur lung a phum a, he hmunah hian 360 KTPA propylene siam theih tur niin plastic siam chhuahna kawnga hmasawnna tur lian taka ngaih a ni.
Tlaia Kolkata a pan hmain Mangaldai leh Numaligarh-a vantlang inkhawmah Modi-a hian hun a hmang bawk.
Thawhtanni hian prime minister hian Kolkata-ah hian sipaite rorelna sang ber, 16th Combined Commanders’ Conference a hawng dawn a. Kum hnih dana hman thin, ni thum chhung awh tur inkhawmpuiah hian ‘Year of Reforms – Transforming for the Future’ tih thupui hmangin nakin zela sipaite inbuatsaihna tur leh insiam thatna turte an sawiho dawn a ni.
Modi-a hian Bihar pan zuiin an state-in thlai a thar chhuah bik hmanga thil siam, thil buatsaih leh thawn chhuah tichaktu tura tih, National Makhana Board a hawng ang a. Purnea Airport terminal building lailawk tur hawngin Rs vaibelchhe 36,000 senna tur hmasawnna ruhrel dinna tur hrang hrang lung a phum bawk ang.