Aizawl: Supply Minister B Lalchhanzova’n Mizorama tuialhthei chhekkhawlna oil depot din tura hmalakna chu a hlawhtlin theih nan theihtawp chhuahpui turin petroleum & natural gas ministry hotute a ngen.
Prime Minister Narendra Modi-a’n Inrinnia Bairabi leh Sairang inkar rel kawng a hawn tawiawm tura lo kal, Ministry of Petroleum & Natural Gas (MoPNG) leh Indian Oil Corporation Ltd (IOCL) hotute chu Supply Minister B.Lalchhanzova’n Zirtawpni tlai khan a pisaah a lo kawm.
An inkawmnaah supply minister chuan Mizoramah oil depot lian tham din a nih theih nan state sorkarin hma nasa tak a la a, a bunna tur ram pawh supply department-in ngawrh taka an zawnpui hnuah IOCL pawhin hmun hnih tinzawn deuh an neih tawh thu sawiin, a ram thlang fel vat se a duh thu leh railway-in Sairang a luh takah phei chuan oil depot siamna kawngah nasa taka awlsamna a thlen a beisei thu a sawi.
Minister hian Mizoram Chief Minister Lalduhoma pawhin oil depot hlawhtlinna tur hian theihtawp a chhuahpui thu sawiin, Sairang railway hawnga prime minister lo kal chu hemi lama hma laksak tura ngenna lehkha CM chuan a lo pe dawn a ni tih a sawi.
Kushagra Mittal, Director, MoPNG chuan Mizorama oil depot din chungchangah minister ngenna chu theihtawpa bawhzuipui a tiam a ni.