Rs. vbc 8,071 senga siam Bairabi leh Sairang inkar rel kawng siam thar chu Inrinni khan Prime Minister Narendra Modi-a’n a hawng.
Ruahman lawk dan chuan PM hi Lengpui Airport a thlen hnuah helicopter hmangin Thuampui helipad-ah tuma chawhma dar 10-ah rel kawng thar hi hawng tur a ni a. Mahse, khua a chhiat bakah chhum a zin nasat avangin Aizawl a thleng thei lo va, biak hmuh theih hmangin Lengpui Airport atangin a hawng a ni.
Rel kawng thar hawnna inkhawmah prime minister chuan khaw chhiat vanga Aizawl a thleng thei lo pawi a tih sawiin ngaihdam a dil a, Aizawl thleng thei lo mah se Mizoram mipui hmangaihna leh duhsakzia a hmuh thu a sawi a. A awmhmun atangin Mizoram mipuite lawmna boruak chu a tawmpui tih a sawi.
Prime minister chuan Mizoram chuan India ram hmasawn kawngah dinhmun pawimawh tak a luah a, vawiin hi India, a bikin Mizoram mipui tan chhinchhiahtlak bik, an hriat reng tawh tur a ni tih sawiin, Aizawl chu tun atangin India railway map-ah a chuang ta a. Chumi atana pawimawh tak, Bairabi leh Sairang rel kawng siam tur lungphumtu leh a hawngtu a ni thei chu a lawm hle tih a sawi.
Prime minister chuan Bairabi atanga Sairang rel kawng chu siam a hautak hle tih sawiin harsatna hrang hrang paltlanga hlawhtlinna hmel an hmu ta chu lawmawm a tih thu a sawi a. Tun dinhmun thleng tur hian engineer-te leh thawktute thahnemngaihna leh inpeknaah fakawm a tih thu a sawi.
Modi chuan, “Kan thinlung chu a hma pawhin a inpawh a, tunah chuan Sairang leh Delhi chu rel kawng hmangin a inpawh ta a. Hei hi rel kawnga inpawh satliah mai lo a, kan dinkhawchhuah theihna atan min her danglamtu tur leh mihringte nunphung thlengin a khawih danglam dawn a. Kuthnawthawktute leh sumdawngte tan zau zawkin inphochhuahna kawng a hawng dawn a ni,” a ti.
Rel kawng hian mipuite tan duhthlan tur tam zawk a siam thei dawn a, a bikin zirna leh damdawia inenkawlnaah rah tha a chhuah dawn tih sawiin, “Hei hian tourism, transport leh hospitality sector-ah te hna tam zawk a siam dawn a ni,” a ti bawk.
Prime minister hian Bairabi leh Sairang inkar rel kawng thar a hawn bakah, rel service thar tur pathum — Aizawl leh Delhi inkara Rajdhani service turte, Aizawl leh Kolkata inkar service tur leh Aizawl leh Guwahati inkara service turte a vai liam bakah Rs. vbc 33 senga sak, Residential School, Kawrthah (Ministry of Minority Affairs) leh Rs. vbc 24 senga sak, Tlangnuam Eklavya Model Residential School (Ministry of Tribal Affairs) chu a hawng bawk.
Hei bakah Rs. vbc 500 senna tur, Aizawl Western Side Bypass Road (MDoNER), Rs. vbc 226 senga thawh tur Mualkhanga Gas Bottling Plant tihchangtlunna turte, Rs. vbc 70 senga thawh tur Chhimtuipui (Tuipui Ferry) lei dawhna tur te, Rs. vbc 45 senga thawh tur Thenzawl – Sialsuk kawngpui laih turte, Rs. vaibelchhe 32 senga laih tur Khankawn to Rongura Hmun kawngpui laih tur leh, Rs. vbc 12 senga thawh tur Khelo Multipurpose Hall, Tuikual, Aizawl lung a phum nghal bawk.
Prime minister-in Lengpui Aiport atanga Bairabi leh Sairang inkar rel kawng a hawn hi Union Railways Minister Ashwini Vaishnaw, Mizoram Larsap Gen. VK Singh leh Chief Minister Lalduhoma hovin MP, Minister leh MLA te, sorkar hotute leh mipui thahnem takin Lammual atangin an hmanpui a ni.