- K. Hmingthankaia
Sawrkar hian mipuite awlsamna tur lam hi kawng hrang hrangin a ngaihtuah chho zel a, a lawmawm hle mai. Mipuite awlsamna tur lam zawnga thil tih hi tuna kan Chief Minister Pu Lalduhawma pawhin a sawi fo thin kha a ni.
Aizawl Civil Hospital OPD card pawh online-a lak theih tura an siam pawh hi mi thenkhat tan a that viau laiin, mahni ina print-na nei lo tan awmzia a awm vak chuang lo. Print theitu hnena hun leh sum sen a ngai leh tho. A nih loh pawhin, damdawiinah OPD card laknaah print-tir tura intlar a ngai leh tho. Hetiang lo deuha tih dan hi sawrkar hian han ngaihtuah chhuak leh thei se a va tha dawn ve le. Engpawh nise, tuna online-a lak theih an tih pawh hi mi thenkhat tan a tha hrim hrim.
OPD card laknaah hian upa kum 60 chung lam card lakna tur an siama, a bul chiahah naupang leh rualbanlote card lakna tur an siam bawk. Mahse, helai hmunah hian awlsamna aiin hatsatna a awm fo.
He card lakna counter pahnih hi mi pakhatin a khawih kawpa, a rei duh em em thin a ni. Tar chaklo leh hrisel tawh lote, rualbanlo din reng harsatte leh, naupang buaipui ngai em em, dam lo leh tleilo em emte bakah, thenkhat rit tawh tak, mahse puak leh pawm reng ngai site chu rei tak tak kan ding ngat ngat thin a ni. Thalai lam zawk card lakna a kal duak duak laiin keini lam chu kan che sawn hlei thei thin lo. Hei hi thuneitu lam hian enfel vat teh se.
Ni 1.9.2025 khan ka intlar ve a, thil awmdan ka chik kual hle a ni. Upa counter-a duty hnenah chuan, ‘ Hetia hmunhnih khawih kawp hi in nitin tihdan em ni? ‘ ka ti a, ” Aw ni e” a ti. A zia lo hle mai.
Aizawl Civil Hospital hi ka kal chang chuan ka chik ru hle thina. Sawisel ngai chu tim miah lovin ka sawisela, fak tlak leh fak phute pawh Chanchinbu-ah lam ka lo fak tawh thin a ni.
Tun tumah pawh hian sawisel ngai leh fak tlakte ka hmu leh teuh naa, tun atan chuan tuna ka sawite khi sawrkar hian ngai pawimawh hmasa phawt teh se tih hi duh tawk phawt hrih mai ang.