Aizawl: BJP Mizoram chuan nimin khan Upper Republic-a an party pisa, Mipui Rûn-ah Karthar Inhlanna leh Political Session hun an nei a. CEM MADC M Laikaw leh CEM LADC N Zangura-te’n thu an sawi.
BJP State Vice President Vanupa Zathang kaihhruai inkhawmah M Laikaw, CEM MADC chuan, MADC area-ah MLA bial pahnih awmah BJP Siaha District chuan theihtawp chhuahin hma an la a, MLA pahnih an thawh chhuak thei tih a sawi a. Mizoramah sorkarna siam turin hma an la zel dawn tih sawiin, tun hmain Congress party-in BJP lo lian tur an hriat lawk avangin Kristian state hoah BJP chu anti-christian tia an sawi rualin, Congress party-ina dawt hmanga an beihna la awih tlat nu leh pa tam takte hrilhfiah chu an mawhphurhna a ni a, Mizoram hma lam hun hi an kutah a awm a, an mawhphurhna a ni tih hriaa an lak a ngai tih a sawi.
N. Zangura, CEM (LADC) pawhin LADC-ah BJP leh a thawhpui ‘UDA’ te’n fiahna an paltlang a, LADC-ah BJP leh a thawhpui te’n nghet takin lungrual takin sorkarna an siam mek tih a sawi a. National Party-a an awm hian ram development tak tak thawhna tur kawng a inhawng a, tualto party atang erawh chuan ram siam thatna tak tak a awm thei lo va. A chhan chu, thil tak tak tihna tur state sorkar atangin a awm loh vang a ni, a ti.
N Zangura chuan central-a Congress party a sorkar lai pawh khan Mizoramah vai party ti mah se, sorkarna an chang a. Mahse, vanduaithlak takin Congress party erawh kha chuan ram leh hnam dah hmasa lo va, anmahni an invulh avang leh corruption a nasat em avangin tunah chuan nasa takin an lo tla chhe ta tih a sawi bawk.