Manchester City coach Pep Guardiola chuan Erling Haaland chu Alexander Isak aia a dah san zawk thu a sawi.
Liverpool coach Arne Slot chuan tun hnaia an striker lak luh, Swedish Isak chu khawvela striker tha ber nia a ngaih thu a sawi a, hei hi an elpui manager chuan a pawm lo hle a, a chhang zui vat a, ani ai chuan Norwegian chu chungnung zawk hret a nih thu a sawi.
Sweden striker Isak chu nipui bazar tawp niah Liverpool hian British player man to ber niin an la lut a, amanah hian £ maktaduai 125 zet an pe a, Pathianni zana Burnley laka an chak tum khan a club thar tan inlan tura ngaih ni mah se a la inlan rih lo.
Haaland hian kum 2022 khan Borussia Dortmund chhuahsana England a pan ve thung a. Pathianni zana Manchester derby a khelh hma thleng khan Manchester City tan Premier League-ah vawi 100 inlan tawhin goal 88 a thun tawh a, Premier League nomawi vawi hnih a lakpui tawh bakah Champions League leh FA Cup pawh a lakpui tawh bawk.
Isak hian kum 2022 khan Spanish club Real Sociedad atangin Newcastle United a zawm a, league-ah vawi 86 inlan tawhin goal 54 a thun tawh a, kum 56 chhung nomawi la tawh ngai lo, Magpies hi season liam taah khan League Cup a lakpui nghe nghe.
Guardiola chuan, “Isak hi player tha zet mai a ni a, chuti chung chuan Erling hi chu a la sang hret zawk a. A nihna takah chuan Erling hi a chungnung berah a awm a ni,” a ti.
“Isak an leina man en hian player tha thawkhat deuh a nih ka ring a. Mi thenkhat chuan Kylian Mbappe tha an ti ber ang a, thenkhat lahin Lionel Messi tha an ti ber ang a, Cristiano Ronaldo tha ti ber an awm bawk ang a. Ka tan chuan Erling aia tha hi an awm lo a. Ka hre chiang a, ka ngaina bawk,” tiin ngaihdan a inang vek thei lo tih Spanish manager hlawhtling chuang a sawi.
Haaland hi goal thun thei chungchuang tak a ni a, Pathianni zana Eitihad Stadium-ah Manchester United hmachhawn tum pawh khan goal hnih a thun leh a, tun season-ah goal nga thun leh tawhin Premier League-ah goal thun tam ber nihna a hauh leh mek tawh bawk a ni.