Mizoram Rifle Association (MRA) buatsaih 12th North East Zone Shooting Championship 2025 zawh fel takah Mizoram chuan gold medal 25 bakah silver leh bronze 21 ve kap chhuakin a pum puah champion an ni.
Kar kal ta Thawhtanni atanga inelna tan hi Inrinni khan Thara Resorts, Falkland Veng, Aizawlah a kharna hun hman a ni a, Chief Minister Lalduhoma’n a hmanpui.
Inelnaah hian a thlengtu, Mizoram bakah hmarchhak state paruk -Arunachal Pradesh, Assam, Manipur, Meghalaya, Nagaland bakah Army leh Army Masked Man Unit atangin silai kap thiam mi 257 an inlan.
Mizoram dawtah hian Meghalaya chu pahnihna niin gold 24, silver 22 leh bronze 15 an la a ni.
Championship kharnaah hian chief minister chuan, “Olympic 2036-ah India hmarchhak state-a silai kap thiamten Olympic medal an awrh lai a hmuh ngei ka beisei. Chumi tur chuan taimakna leh rinawmna, chhelna nen tan la sauh sauh rawh u,” tiin a chah.
A kharna huna hian National Rifle Association President Kalikesh Narayan Sing Deo pawhin a telpui bawk.