Aizawl: Mizoram Hindi Prachar Sabha Office, Mineco-ah Hindi Diwas (Hindi Day) lawmna nimina neih chu Adviser to Chief Minister Lalmuanpuia Punte, MLA chuan khuallian niin a hmanpui.
Khuallian Lalmuanpuia Punte chuan India ram chu bung khat a nih avangin Hindi an thiam hi a tul tih sawiin, “Tleirawl laiin MNF movement vanglai kan tawng a, chu chuan min chiah hneh a, Hindi mai bakah vai hrim hrim ngaihsan lohna vangin Hindi kan thiam lo va, a buaithlakin a inchhirawm hle. Thangkhat lian lai India hmarchhak zirlai pawl hruaitu-ah ka awm a, Hindi thiam loh avanga harsatna hi a taka tawngtu ka nih avangin, zirlai leh thangtharten Hindi zir an uar hi a tul hle a ni,” a ti.
Hindi Diwas hi September 14, 1949-ah India Constitution-in Hindi hi official language-ah a pawm avangin, kum 1953 atang khan kum tin September 14 hian lawm thin a ni a. Kuminah Pathianni a nih avangin nimin khan hman a ni.