Aizawl District Magistrate Er. Lalhriatpuia’n nimin khan khapna thupek tichhuakin, Aizawl district huam chhunga sorkar office (Govt. Institutions) awmna hmun hrang hrang Raj Bhawan, Chief Minister’s Office, Mizoram Assembly Secretariat, MINECO etc. leh a chheh velah sorkar, politics, sakhuana, vantlang leh thil dang engvang mahin mi panga aia tam punkhawm leh bengchhen a khap.
Thupek a tihchhuahah, tunlai hian sorkar lakah thil phut neiin pawl lungawilo, nawrh huaihawt mek an awm thu dawn a nih thu tar langin, “A hnuaia hnathawk ten harsatna an tawh loh hi sorkar duh dan ber a ni. Hetiang thil duhawm loh a thlen loh nan leh thlamuang taka sorkar hnathawk ten an hna an thawh theih nan Aizawl district mipuite zawm turin thuchhuah siam a lo ngai ta,” a ti.
He thupek hi chhuah a nih atanga thla hnih chhung a huam ang a. He thupek bawhchhia an awm a nih chuan Section 223 of BNS hmangin an chungah action lak a ni ang. Amaherawhchu, hei hian dan leh thupek kengkawhtute erawh a huam lo ang.
Hetih lai hian, CSS hnuaia hnathawk intelkhawm AMCECC chuan vawiin hian sorkar laka an thil phutte tihhlawhtlin a la nih loh avanga lungawi lohna lan tir chhunzawm tumin, MINECO open gym kawtah sit-in demontration huaihawt an tum nia hriat a ni.