Aizawl: MNF General Secretary Prof F Lalnunmawia, ex-MLA chuan Forest Conservation Amendment Act, 2023 (FCAA 2023) chu environment leh Zofate hma lam hun hriltu pawimawh tak a nih theih avangin thalaite leh zirlaite pawhin an ngaihven a tul tih a sawi.
Thawhtannia Mizo Hnam Run chhung inkhawmah MNF gen secretary chuan, FCAA-2023 hian ramngaw leh leilung humhalh kawngah a ram mite thuneihna leh chanvo nasa takin a nekchep thei tih a sawi a. “FCAA -2023 chungchangah sorkar leh anmahni tantuten a hlauhawm loh dan leh Article 371(G) hmanga dodal theih a nih loh thu an sawi a; chutih laiin keini ang thoa inhumhalhna dan (Article 371A) nei Nagaland state assembly chuan an dodal thung,” a ti.
FCAA 2023 dan hian environment leh Zofate hma lam hun hriltu pawimawh tak a nih theih avangin thalai leh zirlaite pawhin an ngaihven a tul hle tih sawiin Prof F Lalnunmawia chuan, “FCAA 2023 hmang hian kan ram leh ramngawte hi hun rei lo te chhungin an tichereu vek kher lo ang. Mahse, hun lo kal zel turah project pawimawh changchawiin zawi zawiin kan ram zim têah hian sorkarin defence installation leh mineral resources haichhuahna lamah awlsam zawk hmalak theihna kawng a rawn hawng ta a ni,” a ti.
MNF general secretary chuan, “In humhimna dan nei ve lote pawhin huaisen taka an ram leilung leh ramngaw tihchhiat tur an dodal laia, keini kan hmanraw neih Article 371(G) hi eng anga tha leh chak nge tih pawh enchhin ngam lova leh tang eih lova kan sorkarin FCAA 2023 a pawmpui ta mai hi a pawi hle,” tiin, FCAA-2023 hian hma hunah eng angin nge nghawng thalo a neih theih tih hi ZPM Research Wing leh VUC te hian zirchiang leh deuh turin thurawn a pe duh tih a sawi bawk.