All Mizoram CSS Employees Coordination Committee (AMCECC) chuan nimin khan Mizoram hmun hrang hrangah sorkar laka lungawi lohna lantirin sit-in demonstration an nei.
Aizawl District Magistrate-in thla hnih chhung sorkar pisa awmna hmun hrang hrangah mi panga aia tam punkhawm khapna tichhuak mah se CSS hnuaia thawk intelkhawm chuan sorkar laka an lungawi lohna lantirin Joint YMA Field, Vaivakawnah pungkhawmin sit-in demonstration an nei a. Aizawl bakah sub-headquarter hrang hrangah an pungkhawm bawk.
Aizawl-a punkhawmnaah AMCECC General Secretary Vanlalpeka chuan April 15-17, 2025 chhungin sorkar laka an thil phutt ngaitin pen down strike an lo nei tawh a, DP&AR minister-in theihtawp chhuaha bawhzui a tiam avangin April 19-ah sorkar nen inremna an siam a, May 19-a representation an thehluh chu August thla tawp lama an ngaihvenin an lehkha thehluh a bo thu an dawng a. An chhui zelnaah file engmah a kal lo tih an hmuchhuak tih a sawi a. Inremna an siam hnuah sorkarin a ngaihtuah ve mai dawn emaw an tih laia a ngaithah chu hrehawm an tih thu sawiin, September 3-a general body thukhawm chuan nawrh huaihawt hi an rel ta tih a sawi.
AMCECC chuan September 9-11, 2025 chhung khan sorkara an lungawi lohna lantirin mass casual leave an lo la tawh a. Sit-in demonstration an neih hnuah pawh an hmalakna hi a hlawhtlin hma chuan tawpsan an tum loh thu sawiin, an kal zel dan tur chu an la rel chhunzawm zel dawn tih an sawi bawk.
Nimina Aizawla punkhawm an huaihawt bakah Darlawn leh Sialsuk, Mamit district-ah chuan W Phaileng leh Marpara, Kolasib district-ah Kolasib leh Bukpui, Champhai district-ah Champhai leh Farkawn, Lawngtlai district-ah Lawngtlai, Chawngte, Bualpui NG, Sangau leh Lungpher, Lunglei district-ah Mizofed kawt, Venglai, Zobawk leh Tlabung, Siaha district-ah Saiha District Playground leh Saitual district-ah Saitual leh Phuaibuang-ah te an nei a ni.