Aizawl: Mizoram Civil Service (MCS), Mizoram Information Service (MIS) leh Mizoram Finance & Accounts Service (MF&AS) Officer Trainees 34, Administrative Training Institute (ATI), MINECO, Aizawla Foundation Training nei mekten nimin chawhnu khan Larsap General Vijay Kumar Singh chu Raj Bhavan-ah an kawm.
Larsap chuan MCS, MIS leh MF&AS officer training mekte chu mipui rawngbawl hna thawk tur an ni tih hriaa inpekna leh thahnemngaihna nena hna thawk turte, training chu nakin zel atana pawimawh leh inzirna hun a nih thu a sawi a. Danglamna thlen thei dinhmuna an din hunah hmasawnna leh danglamna thlentu nih tum tura chahin, tun huna an zirte hi nakin huna puitu tur leh inghahna tur a nih thu a sawi bawk.
Officer tharte chu digitisation ngai pawimawh tur leh an thiamna leh theihnate tihpun zel tum tura chahin an hna thawh chhan mipuite dinhmun hria a, policy an siamte an chhawr tangkai theih nana tan la turin a chah a. Hna thawh that avanga miten an hriat reng mi nih tum turin larsap hian a fuih bawk.
An inkawmnaah hian ATI Director Rita Lalnunmawii Pachuau chuan ATI chanchin leh training kalpui dan tlangpuite larsap hi hrilhfiahin financial year kal mekah 24 state funded training leh 32 DoPT funded training an neih thu a sawi bawk.