Mizorama central sponsored scheme hnuaia hnathawkte chuan an hna nghet lova hun rei tak an lo thawh tawh chu tunlai hian a ngheta dah phutin sorkar an nawr mek a. Sorkar lam chuan dahngheh hi a tum hmelin a lang lova. Harsatna lian zawk a thlen a hlauhawm hle.
Central sponsored scheme hnuaia hnathawk mek hi an tam em em mai a. Heng thawktute hi kum rei tak sorkar pawhin a hnathawk pangngai anga a lo en, sorkar thil pawimawh zawng zawngah pawh a hnathawk pangngai anga election duty thlenga a chhawrte an ni. Danin a phal hauh loh sorkar hnathawk nghet lovin sorkar sum leh pai khawih thlengin an tih tir a. Kan sorkar hi CSS staff te avanga kal tawk tawk a ni.
Kan sorkar kal tawh leh tuna mite pawh hi sum leh paiah an harsa em em reng a. Sorkar mamawh ang hnathawktu an la zo lova. He CSS scheme hian ka sorkar harsatna hi an chhawk a, a bik takin kan education department lama zirtirtu indaih lohna nasa lutuk pawh CSS hmang hian an tuaihnum tha leh a ni. CSS hi awm lo se zirtirtu indaih loh vanga sikul khar a tam hle ang. Health deptt lamah pawh hetiang tho hi a ni. Thingtlang a nurse a thawkte hi a nghet lo an tam hle.
Hnathawktu tam tak phei chu kum 30 dawn lai lo thawk tawhte an ni a. An dinhmun ngaihtuah hian dah ngheh an phut hi tun maia nawr an ni lova, sorkar hmasa lamah pawh khan a ngheta dah hi an lo nawr tawh a. Tuna kan chief minister ni mek pawh hian sorkarna an chan chuan heng mite tan hian special scheme siama dah ngheh a lo tiam tawh nghe nghe a ni. An hnathawhna hmang hian hun rei tak chhungkua an lo chawmin chhungkaw innghahna berah an lo hmang tawh thin a ni. Dah ngheh an nih loh a, sorkarin a vauna anga a ban phei chuan chem lovin an lu a la tluk a ni dawn a, chhungkaw tam tak dinhmun chu a rapthlak ngawt ang.
Sorkar lam aiawha thusawi anga ngaihtheih TBC Lalvenchhunga’n ZPM office-a a thusawiah khan heng thawktute hi dahnghah theihna dan a awm lo a ti hial a. An tan hmabak a awm lo a ni ber mai. Hetih mek lai hian health minister Lalrinpuii chuan a tahtawla dah ngheh an nih tur thu a lo puang bawk a. Sorkar-a an luh dan hi a dik lo tih chu sorkar lam tan chhan ber pawh a ni lawi bawk.
Mi sing chuang lai mai eizawnna thlawn mai theia kan din tir hi a rapthlak khawp mai a. Heng hnathawktute hi an chawlh vek chuan office tin an buai ngei bawk dawn.
Thlirna kawng hrang hrang atanga thlirin dah ngheh vek hi chu state sorkar hian a tlin lo hrim hrim a. Anni pawhin an vaia dah ngheh nghal hi an phut a ni lo bawk. Kan sorkar hian an nghehna tur kawng zawngin hun kal tawha Lalduhawma lo sawi ang ngeiin, special scheme te siamin an dinhmun hi ngaihtuah vat se a tha berin a rinawm.