Aizawl: New Delhi-a National Conference on Agriculture: Rabi Campaign 2025 neihah nimin khan Agriculture & Farmers’ Welfare Department Minister PC Vanlalruata’n Mizorama agriculture sector mamawh ber chu farm road tha a nih angin sorkar laipui tanpuina a mamawh thu sawi.
Ni hnih awh tur conference hi sorkar laipui, Ministry of Agriculture & Farmers’ Welfare buatsaih niin state hrang hranga agriculture minister te sawm an ni a. Nakum Rabi season inpuahchahna hun atan conference hi buatsaih niin, hmalak dan tur te sawi hona hun hman a ni.
Conference-ah thu sawiin PC Vanlalruata chuan Mizorama agriculture sector-in a mamawh ber chu farm road tha a nih thu sawiin, “Mizoram chu tlang ram kan nih avangin, inkalpawh zung zung a har a. Fur ruahtui a tam chang phei chuan lei a min nasa thin a, farmer-te tan pawh harsatna tam tak a thlen thin a ni,” tia sawiin, farm road tha zawk neih theihnan central sorkar tanpuina a mamawh thu a sawi.
PC Vanlalruata chuan tlang rama cheng an nih avangin central scheme tam tak hi a nihna ang taka kalpui a harsat thin avangin, leilung leh sik leh sa mila Mizoram tan bik scheme duan a tul thu sawiin, chutiang tur atan chuan central sorkar puihna a mamawh thu a sawi bawk.