Aizawl: MPCC Sr Vice President Lalnunmawia Chuaungo chuan ZPM chu kum khat leh a chanve an sorkar hnuah mi beisei an pha lo hle a. Tunah hian Mizoram mipuiin Congress lam an hawi tan tih a sawi.
Thawhlehni W Phailenga Dampa Central Block Congress hotute nen Kanan Veng Community Hall-a an inkawmnaah Lalnunmawia Chuaungo chuan, “ZPM khan thil tha tinreng an tiam a, an campaign thiam khawp mai. An thli pawh a tleh nasa a, hneh takin thlan tlin an ni a, kum khat leh a chanve an sorkar hnu hian mite beisei an pha lo hle. Tunah hian Mizoram mipuite hian kan lam an lo hawi tan tawh a ni,” a ti.
MPCC Sr Vice President chuan Dampa bial by-election-ah ZPM thli a tleh tawh lo tih sawiin, “An huphurhawm tawh lo a ni tih helai kan rawn thleng a, kan hmu a ni. Inthlan hma kha chuan Taxi a han chuan te hian taxi driver ho hian ZPM an tan em em a, tunah erawh chuan tang rawh u, in sorkar leh a ngai a ni an ti tawh a, ZPM hi an ning em em tawh a ni,” a ti.
Dampa by-election-a Congress candidate John Rotluangliana pawhin thu sawiin, “By-election hi ruling chan a ni thin a, kum hnih vah chuan ruling vung lai tak a ni thin. Tunah chuan ZPM chhiat lai berin kan inthlang dawn a, a phurawm khawp mai,” tiin ZPM Candidate-in Block angin project te an siam tur thu a sawi chu MLA leh Minister te a lo ni ve tawh thinah, chutianga project an siam chu a la hriat ngai loh thu a sawi.
ZPM hian sorkar kal tawh te mawhpuh thin mah se, thil man tih tovah chuan an mawhpuh ngam lo tih sawiin John Rotluangliana chuan, “In banah kan kai ang che u te a ti a, kan chhipah min kai mek a nih hi. He sorkarah hian beisei tur a awm lo a, sawi loh ang hlir a awm an ni,” a ti bawk.
Dampa Central Block Congress Committee Vice President Ngunrthansanga Sailo kaihhruai inkhawmah hian MPCC Adviser Zodintluanga Ralte pawhin thu a sawi.