Barcelona President Joan Laporta chuan centre forward thar lak a duh a, Manchester City striker Erling Haaland chu a duh ber a nih thu El Nacional chuan a tar lang.
Kum 37 mi, Robert Lewandowski chuan Barcelona-ah contract thar a ziak tawh dawn lo a, tun season bak Catalan Club tan a khel tawh dawn lo.
Hetih lai hian Lewandowski a la tangkai hle a, tun season-ah pawh Barcelona goal khung khawl a la ni chho zel dawn niin a lang.
A kum a tam ve tawh a, Barcelona chuan contract thar zawrh an tum tawh bawk lo a, coach Hansi Flick pawhin tun season-ah hi chuan rinrawla hman a tum vak tawh lo nia report a ni a. Lewandowski aiah player naupang zawk, Ferran Torres chu Barcelona innghahna a ni chho mek.
Polish striker hi Flick-an bench-ah a dah hnem a, chutih laiin hun pawimawhah chuan a la khelhtir chho zel tho a, a upat deuh tawh avangin minute 90 khel turin a tlin tawh lo a ni ber mai.
Barcelona chuan nakum nipui bazar inhawn hun atan striker an dap mek, Julian Alvarez pawh an ngaihven zingah a tel nia report a ni.
Laporta chuan Manchester City striker Haaland chu a player awh ber a nih thu El Nacional chuan a tar lang a, Norway striker hi an la thei ang em tih erawh engmah sawi lawk theih a ni lo.
Suma harsatna an la tawh mek zel avangin Barcelona tan chuan Haaland lak hi a har mai thei a; mahse, Laporta chuan sum tam tak thawhchhuah dan a dap thiam dawn nia ngaih a ni a, Manchester City goal thun khawl hi an la lut thei a nih chuan hun rei tak chhung an innghahna a ni thei dawn.
Real Madrid emaw, Barcelona emaw chuan Haaland hi an ngaihven dawn chiang niin a lang a. Tunlai striker zingah chuan ani aia goal khung thei an awm chuang lo va. A palian a, tharum a ngah a, a che rang tel bawk a, goal a khung thei em em bawk.
Ram leh club tan Haaland hian goal khung a chawlhsan thei lo. Etihad Stadium chhuahsan a duh kher lo mai thei a, chutihlaiin club lian zawk zawmna hun remchang a hmu a nih chuan a chhuak duh thut mai thei bawk.