Aizawl: Chief Minister Lalduhoma chuan thingtlang lo neih hi zawi zawia kalsan a nih theihna turin sorkarin hma a la mek zel tih a sawi.
Thawhlehnia Tualpui khaw lo zawhpui a telpuinaah chief minister chuan sorkarin kut hnathawktute a ngaihsak thu sawiin, “A zah a, an kut hnathawh rahte a lawmpui a, malsawmna dawng zel se a duhsak avangin department buatsaihin hman a lo ni thei ta hi a lawmawm hle,” a ti.
Chief minister chuan thingtlang lo neih hi bansan thut theih a ni lo va, zawi zawia kalsan a nih theihna turin sorkarin hma a la mek tih a sawi.
Tualpui leh Champhai inkar kawng hi Nesids Road hnuaiah laih tur a nih thu sawiin CM chuan, “Hei hian kan economy nasa takin a tihpun beisei a ni a, lo zawh hi tourism anga kalpuia khualzin tam zawk khaw dangah hip thei tura ruahhmanna kalpui mek a ni,” a ti.
Chief minister chuan Tualpui khuain ramngaw a neih that avangin model village atana thlan hial a nih thu leh a thawktu tur company nen pawh inremna thuthlung peih fel thawkhat tawh a. Hei hian khualzinte hip thei turin hmasawnna tam tak a keng tel dawn a, nasa taka cheibawl tur ruahmanna siam a ni a, khawtual mipuite pawhin khualzinte dawngsawng thei tura hawihhawmna neia mi pan châk ni tur hmanlai thil hlui humhalhna kawnga tan la sauh sauh turin turin a chah bawk.
Lo Zawh thlengtu, Champhai North bialtu MLA Er H Ginzalala bakah Education Minister Dr. Vanlalthlana, Forest Minister Lalthansanga, Adviser to CM (Political) Lalmuanpuia Punte leh Khawzawl DC Vanlalthiana te pawhin thu an sawi.
Association of Tour Operators Mizoram (ATOM), Tourism Department leh Agriculture Department tangkawp ten Agro Tourism chawikan nan Lo Zawhpui hi an buatsaih a ni.