Aizawl: Power & Electricity (P&E) Minister F. Rodingliana chuan ZPM-in state budget mil tawk turin policy an duang a, an policy hlawhtlinna hmel pawh an hmu chho zel tih a sawi.
Nilaini khan P&E Minister F Rodingliana chuan Kanghmun, Bawlte, Darlung, S.Sabual leh Bawngthah khuate a tlawh a; Dampa bial by-election lo awm tura ZPM official candidate Vanlalsailova’n a tawiawm.
Khaw hrang hrang a tlawh naain P&E minister chuan ram tana an rawngbawlpui, Lalrintluanga’n hun lo taka mual a liamsan chu pawi a tih thu a sawi a. Dampa bial mipuiten bialtu tur thar an thlan a ngai dawn si a, sorkar hmalak meknate leh hmalak tum dan te, he bial pawhin a chhawr ve theih tur tam tak a awm tih a sawi.
ZPM chuan state budget mil tawk turin policy an duang tih sawiin F Rodingliana chuan, “Kan policy hlawhtlinna hmel pawh kan hmu chho zel a ni,” a ti a. Party dang policy chu mipuiten an chhawr ve dawn chuan unit enrollmemt fee-te nena thleng a ngai thin a, ZPM sorkarah chuan a thawkrim ten an chhawr mek tih a sawi a. Mizorama ro lo rel tawh party pahnih ten kum 30 chuang an tih theih loh chu ZPM sorkarin kum hnih khat lekah tihzawh tir vek an tum tih a sawi.
Dampa bial by-election ZPM candidate Vanlalsailova pawhin thusawiin, mipui khawngaihna leh duhsakna dawnga malsawm zawk a nih chuan, theihtawp tak meuh meuh chhuahin Lalrintluanga sulhnu te, a hmachhawp te tihhlawhtling turin sorkar developement leh MLA fund te nena tangkawpin Dampa bial tan hna a thwk dawn tih a sawi.