India leh US chuan sumdawnnaa thawhhona an neihna tura inremna sawiin New Delhi-ah an inbe tha leh mek a, Thawhlehnia an inbiak hi Washington-in Indian bungrua a lak luha chhiah sang a lak hnua hmaichhana an inbiak lehna hmasa ber a ni.
Darkar sarih vel ram pahnih aiawhte hi an inbia a, insumdawn tawnna atana inremna siam an tum, rei tak an puitlin theih loh chu hma lam an panpui tan.
Office of the United States Trade Representative (USTR) aiawhte chu Chief Negotiator for the India-US Bilateral Trade Agreement Brendan Lynch-a’n hovin Indian aiawhin Department of Commerce an tel a, Special Secretary Rajesh Agarwal-a’n a ho.
Indian commerce ministry-in thuchhuah a siamah an inbiakna chu ‘lawmawm lam leh hma lam pan’ a nih thu leh sumdawnna inremna tur huang hrang hrangte an sawiho tih a tar lang a. Lehlam lehlam hian an hlawkpui ve ve theih tur inremna chu a hma thei ang bera siam an duh niin a tar lang bawk.
Thawhlehnia an inbiak hi August atanga an chawlhsan tak, inbiak thawh rukna anga chhiar a ni lo va, thawh rukna tur atana inbuatsaihna erawh kalpui mek a ni.
New Delhi-in Russia atanga tuialhthei a lei zel avangin President Donald Trump-a chuan Indian bungrua an lak luhah chhiah 50% a laksak a, hei vang hian ram pahnih inkar hi a tha vak lo va, hetiang karah hian indawrna hi kalpui a ni a. Washington chet dan avang hian khi deuh awm mah se Trump-a chuan India nena inremna hi siam theih ngei a beisei tih a sawi tho a ni.
New Delhi-in lo atanga thar chhuah leh ni tin inchhung khur mamawh a thawn chhuahte chu Washington-in ngaihhnathiamna nei deuh mah se a dinhmun a la derthawng hle tho va. US thuneitute chuan tun tumah hian in chhung khur mamawh hlawm lian thawn chhuah aiin cheese tha chi leh vaimim thawn chhuah lam an ngaihtuah rih zawk tih an sawi.
Mi thiamte chuan lehlam lehlam hi inremna siam tumnaah hian nawrtu an nei ve ve an nei niin an sawi a. Trump-a chuan lo neihna kaihhnawih thil thlah zalen chu politics-a a ngaih pawimawh a ni a, India tan a bungraw thawn chhuaha chhiah sang tak lak hian an thil thawn chhuah a nghawng theih avangin inremna neih an duh ve bawk.
A thawh ruk nana inbiakna hi neih thuai a nih rin a ni a, ram pahnih hian a lailawka inremna tal chu kumin chhunga neih hman an tum ve ve a ni.