Liverpool coach Arne Slot chuan Newcastle United atanga an lei, Alexander Isak chu a tir atanga beisei san vak te, nawr chiamte a la tul lo tih sawiin, dawhthei taka ngaihchan a la ngaih thu a sawi.
Liverpool hian Premier League record thar siamin £ maktaduai 125-in Swedish Isak an lei a. Kum 25 mi hi season tharah hian minute 18 chauh a la inkhel a, chu pawh Kosovo laka 0-2-a an ram an tlawm tumah a ni.
Slot chuan Sweden coach Jon Dahl Tomasson chu Isak a khelh reitir loh avangin a fak hle a, Liverpool pawhin ngaihchan pahin khelh tamtir an tum rih loh thu a sawi chhuak.
“Sweden-in Alex an khelh reitir lo ang chiah khan keini pawhin kan tih ve a rinawm a. Khelmualah minute 90 awm ziah tura beisei chi a ni lo,” a ti.
“Tun hnaiah chuan minute 90 kan khelhtir rih lo ang. Season tan hmain kan hrual hman lo a, team training-naah pawh thla thum emaw, thla li emaw a tel tlat lo a ni,” a ti bawk.
A sawi zelnaah, “Kan kaihruai chho ang a, hma sawn belh zel thei turin kan enkawl dawn a. A tam thei ang ber game khel thei tura kan hrual a ngai a, training a neih tlem avangin rim taka a beih chhoh pawh a ngai dawn,” a ti a ni.
“Kar hnih atana la lut kan ni lo a, kum ruk chhung atan thuthlung kan ziahpui a, hei hi tute pawhin an hriat chian a ngai a, a bikin kan club tantute chuan an theihnghilh tur a ni lo,” tiin Liverpool coach Slot chuan a sawi.
Liverpool hian Nilaini zan khan Champions League-ah Atletico Madrid an mikhual a, hetah hian Slot-a chuan a striker thar hi a khelh tur thu a sawi ngei a; mahse, a sawi tawh angin hun pum khel tur chu a ni lo tih thuthar lakhawmtute a kawmnaah a sawi a. A tahtawlin, zawi zawiin a chhawr tam hret hret dawn a nih hmel.