Mizo Idol season thar intihsiakna neih meka judge thar turte pho chhuah an ni ta.
Zonet buatsaih Mizo Idol pawhin season 8-na hmel a hmuh rualin, judge thar pathum hmel a hmu dawn ta a. Hnah hluite chu hna tharin a rawn thlak ta a ni ber mai.
LESDE Mizo Idol Season 8-a judge thar pathum turte chu — K Hminga, Hmingtea Chhangte leh Jaui te an ni. Anni hian hun rei tak judge thuthmun lo rem tawhtu — Rinzauva, Vari Varte leh Robin-a te an thlak dawn a ni.
Judge thar pathumte hi Zo rimawi khawvela kan hmelhriat tawhsa vek an ni a. ‘I Hlutna’ hitmaker ni a, Mizo Idol-ah pawh guest judge lo ni tawh Jaui te, ‘Hmangaih Hmasa ber’ hitmaker K Hminga leh Mizo Idol intihsiakna hmasa bera pathumna dinhmun lo luah tawh Hmingtea Chhangte te hi inhmelhriat chawp tir an ngai tawh hlawm lo vang. Tawnhriat pawh an nei tha tawh hlawm viau.
K Hminga, Jaui leh Hmingtea Chhangte te hian first round intihsiakna atangin an endik tan nghal dawn a. September ni 23, zan dar 8 atangin First Round intihsiakna hi tan a ni dawn a ni.