Aizawl: Urban Development & Poverty Alliviation (UD&PA) Department Minister K. Sapdanga chuan ‘Swachhata Hi Seva Campaign 2025’ a hawng.
MINECO-a SAD Conference Hall-a hawnna inkhawmah UD&PA Minister K. Sapdanga chuan, India ram puma an chhehvel hmunte tihfai beihpui thlak puala inzirtirna hun, ‘Swachhata Hi Seva’ campaign a hawng thei chu lawmawm a tih thu a sawi a. Faina kawnga tan lak chu phurrit a la lo va, thil hlimawm leh hun nuam tak anga hmang a, chu chu Swachhata Hi Seva thupui pawhin a tum a ni tih a sawi.
K Sapdanga chuan Mahatma Gandhi pawhin ‘Faina chu zalenna ai pawha pawimawh zawk a ni’ a tih thu sawiin, Mizote pawhin faina chu a nun an nunpui a hun tawh tak zet tih a sawi a. Kalkhawmte chu mi dangte thinlungah ‘faina chu mi tin tan a ni’ tih chu pu darh theuh tur leh Swachhata Hi Seva 2025 chu hlawk taka hmang theuh turin duhsakna a hlan.
Swachhata Hi Seva hi ni 15 (September 17- October 2) thleng awh tur a ni a. He hun chhung hian Cleanliness Target Unit (kan chheh vel hmun kilkhawrte) tifaia hun hman tur a ni. Kumina Swachhata Hi Seva thupui, ‘Blending Community Action and Festival Spirit’ hian, faina beihpui thlak chu a hlimawm zawng leh phurawm taka kalpui a tum a ni.