Aizawl: Aizawl district chhungah polling station thar 35 siam belh a ni dawn.
Ningania DC Conference Hall-a District Election Officer, Aizawl District Er. Lalhriatpuia IAS kaihhruaina hnuaiah District Level Standing Committee on Rationalization of Polling Station, Aizawl District thukhawm chuan, Election Commission of India (ECI) in voter te tana remchan zawkna ngaihtuah a, voter 1200 aia tam awmna Polling Station te, polling station pahniha then (polling station thar siam belh) tura thupek a chhuah bawhzuia DEO Office, Aizawl hmalakna leh Polling Station thar 35 siam belh tura proposal an siam chu pharh niin, DLSC chuan lungrual takin proposal hi a pawmpui a ni.
Aizawl District hnuaiah hian voter 1200 aia tam awmna polling station 35 a awm avangin, polling station thar 35 siam belh tur a ni a. Polling Station thar siam belh tur hi a veng chhunga political party hrang hrang leh tlawmngai pawl hrang hrangte hriatpuina leh pawmpuina hnuaiah AERO leh BLO ten a hmuna an enfiah vek hnua proposal hi siam a ni.
Polling Station thar 35 siam belh bakah hian polling station thar siam belh lova voter siksawi remchanna Zemabawk-II leh Bethlehem Vengthlang-I hnuaia Polling Station-a voter thenkhat chu Zemabawk-V & VI a sawn an ni dawn a. ITI Veng-I & II hnuaia Polling Station pahnih YMA Community Hall-a mi chu ITI Block-II a sawn a ni dawn bawk.