- Zoa Tlau, Buannel Cabin
Mizoram sorkar hnuaiah hian ‘service’ awhawm tak tak a awm a, thenkhat erawh kum tam tak an thawh hnu pawha ‘regular’ thei ve ta miah lo an awm bawk.
Tlangkam titi atangin DP&AR lam ber hi MCS, MSS etc. te awmna a ni a, anmahni ‘service’ kaihhnawih hi chu an tifel awlsam a, zirtirtu, health lama thawk etc. vel hi chu an ngaihthah duh viau, an ti a. Ka hre thui ve loa a sawitute erawhin chiang an inti viau.
- A thena sur, a thena sa:
Department thenkhatte pawh hi file hian dawhkan a paltlang hnem khawpa Under Secretary, Deputy Secretary, Joint Secretary, Secretary te MCS leh IAS tea a tawp hnuah Minister PS khan file kha a lo endik ve leh chauh an ti a. File endiktu tam lutuk, officer enkawlna hautak lutukte pawh hian sawi a kâi ve viau. Secretary pakhatin Department pakhat a enkawl a, Pu Franklin-a IAS kha tuna a awmna state-ah Secretary niin Department paruk a enkawl tih a ‘cousin’ in min hrilh nghe nghe. Kan kalphung hi mak deuh a ni. Pawisa a awmna lamah chuan a tam hmel.
- Dem mai lo ila:
Tuna CSS nuar mêk te zingah hian DPC kaltlang lo emaw, fel viau lo ‘political appoinment’ deuh pawp pawpa lâk te an awm nual an ti bawk a. Hetih lai hian dik taka lâk an awm nual an ti bawk. A enga pawh chu ni se, nutling patlingin chhungkaw chawm nân hei leh chen hna an thawk tawh a, an dinhmuna awmah hian indah ila, ngaihthah leh dem mai mai chi an ni hauh lo ang. Thenkhat phei chu an ‘pension’ tep tawh tih te a la ni deuh deuh.
- An vai vai chuan…:
Congress Minister hlui pakhatin tun buaina chungchanga min hrilh chu, an hun lai khan a tatawlin a ‘seniority’ ang zêlin tam tham tak ni lo chu an ‘regularized’ ve zêl thin a ti a. Anni pawhin a hlawm hlawma ‘regular’ tir a harsatzia an sawi tho, MNF Minister hlui te pawhin an sawi tho chu ania. Dr. Thangtea pawh khan a lo tiam ve ngawt tawh tho kha.
Kum 2023 tawhah khan SSA hnuaia thawk bîk te MSSTA chu Gauhati High Court-ah an zualko niin a lang a, Gauhati Hight Court Aizawl Bench hian MSSTA member-te chu thla ruk (niin ka hria) chhûnga state sorkara dah nghet turin a ti nghe nghe.
- Tlangkawmna:
AMCECC lam pawh hian min lo hrethiam se la, thil kal dan te, sorkar sum dinhmun te en hi chuan nuar bur bura innawr chi a ni viau lo em aw, a tih theih. Court lamah hian AMCECC lam pawh hi kal ta mai se la, ‘humanitarian ground’ ringawt atanga thlir pawhin an dinhmun hi ngaihsaka duhsak an phû tawh viau awm asin! A bawplawka lâka sâwtna awm si loa inbeih chiam hian rahtha a thlen loh a hlauhawm a, a thuanawp zawnga kalna a thlen ang tih a hlauhawm.