Aizawl: ZPM Coordination Committee nimina thukhawm chuan CSS Employees Regularization Scheme chu siam that an remti.
CSS hnathawkten sorkara an thil phut hrang hrang tihlawhtling tura lungawi lohna an lantir mek chungchang ngaihtuahin ZPM Coordination Committee chu Chief Minister Lalduhoma hovin an thukhawm a, CSS Employees hnathawhte an ngheh theihna tura sorkar hmasain CSS Employees Regularization Scheme a duan sa chu a khirh deuh niin a hria a, CSS Employees Regularization Scheme hi danin a phal chinah awlsam deuh zawk a siam that leh nise an ti.
ZPM Coordination Committee chuan CSS Employees-te mipui harsatna siam tawh lova hna ngai chhunzawm tawh turin a ngen nghal a ni.
Hetihlai hian AMCECC bultumin CSS hnuaia thawkte chuan lungawi lohna an lantir chhunzawm a, Aizawl, Lunglei, Siaha, Champhai, Kolasib, Serchhip, Mamit, Saitual, Khawzawl, Hnahthial, Ngopa, Phullen leh Suangpuilawnahte mi thahnem tak an pungkhawm a ni.