Hmasawnna hrang hrangin min luhchhuah a, kan ramah pawh hmasawnna hnathawh hrang hrang awmin, kan nunphung thlengin a danglam chho ve zel a, kan lo insiamrem a, kan ram leh hnam humhalhna rilru pu chunga ke kan lo pen thiam ve pawh a ngai hle.
Relin kan ram khawpui a rawn pawh tawh a, kan nun leh chetvelna kawnga awlsamna tam tak min thlen dawn tih a chiang a, kan zin veivahna thlengin engkim a awlsam chho lehzual dawn. Kan fimkhur erawh a tul hle.
Vai ram pilril kan tihte thlenga min thlunzawmtu he rel lo lut hian hnamdang tam tak a rawn chhawm chho zel dawn a, kan lo inven lawk a, kan inhungbikna ILP thlengin kan duhkhirh a, a endikna hmun kan dah tam pawh a va tul em.
Kan inhungbikna hi thlah zalen huk chi a ni lo a, ILP check na hmun siam tam leh duh khirh zual zel kan ngai tih hi hrereng ila, hnamdang, ram pilril zawka mite hian engmah hre hlei lova min luhchhuah hi an tum ngat ngat reng dawn a, kan lo inven nasat sauh a ngai tak zet.
Hemi ti tur hian sorkar in chet lak a ran a ngai a, muangchan chi a ni tawh hek lo. A tul a nih chuan endikna hmuna thu tur leh endikna siam belh teuh tur hian mihring pawh a la mai tur a ni. Chuti a nih loh chuan rel vawikhat phurh tam theihzia kan hria, kan him rei dawn lo. Chet lak thuai thuai kan ngai e.