Aizawl: Mizorama kutkawih eizawnna leh kutthemthiamna tihhmasawnna tur atan Mizoram Entreprenuership Development Institute (MEDI) din tuma hmalak a ni.
Ningani khan Entrepreneurship Development Institute of India Director General Dr. Sunil Shukla chuan chief minister Lalduhoma chu a pisaah kawmin, Mizoram Entreprenuership Development Institute (MEDI) din dan tur a sawipui.
An inkawmnaah hian chief minister chuan MEDI in rawtna hrang hrang an neihte chu a huam a zauvin, department kaihhnawih a ngah hle a, inrawnkhawmna zau zawk neih a tul dawn a. Coordination Committee din a, chak taka bawhzui an tum tur thu a sawi.
Dr. Sunil Shukla chuan Mizoram sorkarin hmunhma an pek theih chuan CSR Fund an zawn khawm leh Central Scheme atanga fund awm theite hmangin, kutkawih eizawnna leh kutthemthiamna lama hmeichhiate leh zirlai naupangte tan zirna in tha tak MEDI an din theih tur thu a sawi a. A tir lam kum 5 chhungin Entrepreneurship te, Skill training te, start-up te, incubation leh mentoring lamte takin an kalpui ang a. Kum 8 vel chhunga mahnia campus nei theia din an tum zui dawn tih a sawi bawk.