European Commission chuan New Delhi-in Moscow hnaih zel mah se India nena ram venhimna, technology leh sumdawnnaah inkungkaihna thuk neih tha an ti.
European Union leh India hian free trade agreement siam tumin hma an la mek a, kum tawpah chuan tihfel hman an tum nghe nghe.
Sumdawnnaa inremna tur atan hian kum 2022 atang khan indawrna an kalpui thar leh a, US-a Donald Trump-a’n thuneihna a chan leh hnuah an hmanhmawh lehzual a. Trump-a hian an pahnih hian tariff sang tak a laksak ve a, hei hi inkungkaihna thar nei tura an hmanhmawh chhan ber a ni.
EU hian Mexico, South American ram tangrual Mercosur, India leh Indonesia te chu sumdawnnaa inkungkaihna thuk zawk neihpui tumin hma a la mek a. India bik hi China leh Russia awn hle mah se a hnar bik lo.
India hian Russia-in kum 2022-a Ukraine a rûn hnu atangin Russian tuialhthei a leisak tam sauh va. Thla hmasa khan Indian Prime Minister Narendra Modi-a hian Russian President Vladimir Putin-a chu China-a summit-ah a hmu a, Russian kaihhruaia sipai nunchan zirnaah a sipaite a tir ve bawk.
Zirtawpni kal ta khan US thuneitute chuan G7 leh EU ramte chu Russian tuialhthei an leisak avangin China leh India lakah tariff sang la turin a nawr nghe nghe.
EU foreign policy chief Kaja Kallas-a chuan India nena an inkarah hian ‘inrem theih lohna lai bik’ an nei ngei a, chu chu thuk zawka an inpawhna daltu pawh a ni tih a sawi a; mahse, ram tangrualte hian New Delhi hi ‘Russia a kawmngeihna dodal zawnga dawr’ erawh an tum lo tih a sawi thung.
Nilainia lehkha an tihchhuahah commission chuan EU hian India chu Russia-a sipai lam leh EU hrekna palzut lo zela dawr zui ni se an ti tih tar lan a ni.
European Commission hian India hi kum 2030-ah chuan khawvela economy lian ber a nih theih mai an beisei thu pawh tar langin, an than zelna tur karah an tana hlawkna tur pawh lo dap ve tha an ti tih tar lan a ni.
EU hian an pahnihin investment leh vansanga bungraw phurhah chuan inremna an nei tawh tih sawiin hydrogen thianghlim, industry lian atanga boruak bawlhhlawh chhuak tihtlem leh thil zirbing leh thil thar chin chhuahah pawh an rilru a inmil hle tih an sawi bawk.
Ram venhimna thilah pawh India nen hian inremna an neih theih thuai tur thu an sawi a, hetiang hi Japan leh South Korea nen pawha an neih tawh niin Africa leh Asia chhim lam ram rethei zawk pawh dawr zel ni se an ti a ni.