Aizawl: BJP Mizoram chuan Seva Pakhwada Program kal zelah nimin khan Sairang rail station tifaiin an hnatlang.
Hmasawnna hmel thar hmuh zawh hnua rail station leh a chhehvela bawlhhlawh tam tak a awm nghal mai chu BJP Mizoram chuan zia lo an tih thu an sawi a. Hmasawnna hian a ken tel pawimawh tak chu faina a nih thu sawiin, hmasawnna thar hmu mah se, ni khat thil thuah rail station-a bawlhhlawh a tam nghal lutuk chuan inenfiah an mamawh zia a tar lang nia an hriat thu an sawi.
BJP Mizoram chuan rel rawn lut chu hmasawnna a nih rualin, ram dang mi, khualzin te pawhin faina an ngaih pawimawh theih nana rail station-a bawlhhlawh paih dan kalphung pawh thuneituten ngun zawka enpui vat a tul thu an sawi a. Rela zin tur tualchhung mipuite pawh faina ngaipawimawh turin an ngen a, inthiarna hmun leh station vawn fai chu mi tin mawhphurna a ni tih hre theuh turin mipui an chah.
Rail station tihfai hnatlang neih zawh hnuah hian sairang rail station bulah thingphun hnatlang an nei nghal bawk.
Hnatlangah hian BJP State hruaitute bakah member thahnem tak an thawk chhuak a ni.