Dampa bialtu MLA boral tak avanga inthlan thatna awm turah hian political party lian deuh kan neihte chuan candidate an siam deuh vek ta a, a hun leh ni puan hun an nghak a ni ber ta.
Hetianga inthlan that a lo ngaih takah chuan party tinten an tlin ngei theih nan theihtawp an chhuah tan a, tun tum bye-election lo awm turah ngei pawh hian inbeihna a na chho leh ngeiin a rinawm. MLA boral tain a tihhlawhtlin hman loh tam tak a awm ngei bawkin a rinawm a, heng bawhzui kawngah leh bial mipuite tana tan la tura ke pen ngam an pawimawh hun chiah a ni.
Kan ramah hi chuan hun hmasa lam atangin vote duhin a hunlaiin theihtawp chhuah thin hlawm mah se, thlan tlin an nih chiah hian mahni duh dana tal a, mahni block/unit hruaitute hlau ta deuh tlat tam tak hi an awm ta thin a, hemi system hi tihbo a hun tawh hle.
Dampa bialah pawh hian inthlanna felfai leh voters te rilru tibuai zawng ni lo, thianghlim tak chunga inbeih dan hi awm se la, candidate leh party hruaitute pawhin inbeihna duhawm leh a hnu thlenga a lawmawm zawnga sawi reng tawh tur hnutchhiah chungin bul tan thei se, thlan tlinte ngei pawhin bial mipuite aiawh zo ngei tura hnathawh a tul bawk ang. Kan kalphung hi tun atanga her rem chungin, thalai tuaitir zawkten politics an tuipui a, luh an chak lehzual theihna turin kalphung inherrem zel mawlh bawk teh se.