Aizawl: Transport Minister Vanlalhlana chuan Mizo Students’ Association (MSA) Bangalore-ten kum tina an buatsaih ‘Zirna Kutpui’ chu United Theological College, Bengaluru-ah Inrinni khan khuallian niin a hmanpui.
Khuallian Vanlalhlana chuan zirlaite chu Mizoram pawna an awm chhan hre reng turin a chah a. Nakin lawka ram leh khawtlang hruaitu turte an nih avangin, tun atanga kum eng emaw zat an hman danin hmalam hun thui tak a hril dawn tih a sawi a. Zirlaibu atanga thiamna bakah thiam thil dang nei tura intuaihriam zel turin leh khawvel inher danglam mila insiamrem thiam turin a chah.
Minister chuan zirlaite chu nun kawng an zawh chhohna turah harsatna hrang hrang hmachhawn thiam mi nih a pawimawh thu a sawi a. Chung harsatnate chu chhelna leh tumruhna petu a hmang thiam zawk turin a fuih a. Mizoram pawna eizawnna hna tam tak awm te hi dinchhuahpui nana hmang turin, hnam dang zingah pawh hmasawn tumna rilru leh mahni inthunun theihna nei chungin, Mizo tihmingthatu nih tum tlat turin zirlaite fuihin, sorkar hna bakah private sector-ah ngei pawn thiamna nei, a ngaihna hre tan chuan dinchhuahna tur a awm a ni, a ti bawk.